لاسانجلس ټایمز: امریکا په افغانستان کې خپل استخباراتي نفوذ ساتلی دی
لاس انجلس ټایمز له افغانستانه د امریکايي پوځیانو د وتلو په اړه نیوکو ته په اشارې لیکلي، هېڅ داسې وړاندوینه نه شته چې د دغې دردوونکې وتنې په اړه دې پلې شوې وي.
لاس انجلس ټایمز له افغانستانه د امریکايي پوځیانو د وتلو په اړه نیوکو ته په اشارې لیکلي، هېڅ داسې وړاندوینه نه شته چې د دغې دردوونکې وتنې په اړه دې پلې شوې وي.
په دغې مقالې کې ټینګار شوی، امریکا سره له دې چې خپل ځواکونه یې له افغانستانه واېستل؛ خو په استخباراتي ډګر کې یې خپل نفوذ په خپل ځای ساتلی دی.
د امریکا پخواني ولسمشر دونالد ټرمپ او ځینو نورو ډیپلوماټانو او پخوانیو پوځیانو، په تېرو درېیو کالو کې ډېر ځله له افغانستانه د هغه هېواد د ځواکونو د وتلو په اړه اندېښنې په ډاګه کړې دي.
ټرمپ تل په ټاکنیزو غونډو کې له "افغانستانه شرموونکې وتنه" یاده کړې او هڅه یې کړې، چې د دغې وتنې له امله د بایډن او هرېس پر حکوکت نیوکې وکړي.
لاسانجلس ټایمز لیکلي، چې امریکا دمګړۍ د ۱۹۹۰ لسیزې پرتله نن سبا افغانستان ښه پېژني. په مقاله کې راغلي، په کابل کې د القاعده د مشر بریالۍ وژنه دا څرګندوي چې دغه هېواد په افغانستان کې په استخباراتي ډګر کې برلاسی دی، په داسې حال کې چې تر دې وړاندې ډېری په دې باور وو، چې د امریکايي ځواکونو له وتلو وروسته به دغسې کړنې نورې هغه هېواد ته ناشونې وي.
دغې ورځپاڼې په افغانستان کې د ترهګرو ډلو لهخوا د بریدونو په مخنیوي کې د امریکا کړنو ته اشاره کوي او لیکي، چې په روسیه او ایران کې د داعش خراسان ډلې بریدونه او په اړه یې د امریکا کره خبرداریو دا وښوده چې امریکا په سیمه کې کره استخباراتي نفوذ لري.
خو له دې سره هممهاله دغو دواړو هېوادونو د امریکا خبرداریو ته پاملرنه و نه کړه.
په ایران کې داعش خراسان ډلې په یوې چاودنه کې ۸۴ کسه ووژل او په مسکو کې یې پر یو کنسرټ د څلورو بریدګرو پر مټ له ۱۴۰ کسانو زیات وژلي وو.
په مقاله کې دا رنګه راغلي، په افغانستان کې واک ته بیا د طالبانو له ستنېدو او دغلته د نورو جهادي ډلو د پراخه حضور سره، سره نورې ډلې خپلواکه نه دي او د طالبانو تر نظارت لاندې فعالیتونه کوي.
کتونکي په دې باور دي، طالبان هڅه کوي دغه ډلې داسې وساتي چې د هغوی واک له ګواښ سره مخامخ نه کړي.
لاسانجلس ټایمز د مقالې په پای کې لیکي، چې لا هم افغانستان یو خطرناک هېواد دی او د دغه هېواد خلک د ښه راتلونکې لپاره هیلهمن نه ښکاري؛ خو هغه وړاندوینې هم سمې نه دي راختلي، چې ویل کېدل له افغانستانه د امریکايي ځواکونو بېړنۍ وتنه به د امریکایانو په زیان تمامه شي.
په ازبکستان کې د امریکا سفیر وايي، د افغان پوځ ۴۶ الوتکې به د ازبکستان تر څارنې لاندې پاتې شي.
په ازبکستان کې د امریکا سفیر جوناتن هینیک ازبک کوون نیوز ورځپاڼې ته ویلي، چې امریکا او ازبکستان د افغان پوځ اړوند د هغو جنګي الوتکو او پوځي چورلکو د وضعیت په اړه موافقې ته رسېدلي، چې د افغان پېلوټانو له خوا په ۲۰۲۱ کال کې ازبکستان ته وړل شوې وې.
د دې پوښتنې په ځواب کې چې ایا دغه الوتکې او چورلکې به په ازبکستان کې پاتې شي، هینک وویل: "دغه پوځي وسایط به په ازبکستان کې پاتې شي، په دې اړه موافقه شوې ده."
هینیک یادونه وکړه، چې ازبکستان او امریکا په دې مساله کې ګډ کار ته دوام ورکوي او زیاته یې کړه: "دا الوتکې او چورلکې هیڅکله د افغانانو ملکیت نه وو، دا د امریکا ملکیت دی. افغان پوځ دغه الوتکې او چورلکې کارولې؛ خو موږ یې تل مالکان وو. "
وروسته له هغه چې د ۲۰۲۱ کال په اګست میاشت کې طالبانو د افغانستان واک تر لاسه کړ، د افغان پوځ ګڼې جنګي الوتکې او پوځي چورلکې د افغان پوځیانو له خوا ازبکستان او تاجکستان ته یوړل شوې.
د ازبکستان د څارنوالۍ دفتر د ۲۰۲۱ کال د اګست په ۱۵مه ویلي وو، چې د افغان وسله والو ځواکونو ۲۲ پوځي الوتکې او ۲۴ چورلکې د ازبکستان له هوايي حریم څخه سرغړونه کړې او دغه هېواد ته ننوتلي دي.
په داسې حال کې چې طالبانو له ازبکستانه د دغو الوتکو د بېرته اخیستو غوښتنه کړې، ازبکستاني چارواکو ویلي، چې له امریکايي لوري سره د یادو پوځي وسایطو د وضعیت په اړه لا هم خبرې روانې دي.
