د ازادۍ جبهه وايي، چې په کابل کې یې د یو برید له امله شپږو طالبانو ته مرګ ژوبله اړولې
د افغانستان د ازادۍ جبهه وایي، چې تېره شپه یې په کابل ښار کې پر طالبانو برید کړی او په ترڅ کې یې څلور تنه طالبان وژلي او دوه نور یې ټپیان کړي دي.
د افغانستان د ازادۍ جبهه وایي، چې تېره شپه یې په کابل ښار کې پر طالبانو برید کړی او په ترڅ کې یې څلور تنه طالبان وژلي او دوه نور یې ټپیان کړي دي.
دغې جبهې د یوې خبرپاڼې په خپرولو سره ویلي، چې برید یې د دوشنبې په ماښام د (وږي په پنځمه) د کابل ښار په پنځلسمه ناحیه کې د «روسانو سړک» ته څېرمه د طالبانو پر یوې پوستې کړی او د طالبانو د استخباراتو یو چارواکی فضل الحق حقاني یې په نښه کړی دی.
په خبر پاڼه کې دا رنګه ویل شوي، چې تر دې مهاله د فضل الحق حقاني د برخلیک په اړه مالومات نه دي تر لاسه شوي.
د ازادۍ جبهې ادعا کړې، چې په دغه برید کې یې د طالبانو یو هایلکس موټر هم ویجاړ کړی دی.
تر اوسه طالبانو په دې اړه څه نه دي ویلي او نه هم کومې بلې خپلواکې سرچېنې د دغه برید پخلی کړی او افغانستان انټرنشنل هم د یوې خپلواکې رسنۍ په توګه د دغه خبر تایید نه شي کولای؛ خو د افغانستان د ازادۍ جبهه ډېر ځله د دغسې بریدونو په اړه خبرپاڼې او ویډیو ګانې خپروي.
