د یوناما مشره وايي، طالبانو د افغانستان په اړه د راپور ورکولو په خاطر پرې نیوکې کړې دي

د افغانستان د ملي مقاومت په نوم د طالبانو مخالفې وسله والې جبهې په خپله اعلاميه کې لیکلي، چې د طالبانو په وړاندي عمليات يې د هېواد په بېلابېلو سیمو کې دوام لري.

طالبانو تر اوسه د دغه بريد او دوی ته د اوښتي مرګ ژوبلي په اړه څه نه دي ويلي.

تر دې وړاندي هم د مقاومت جبهې د کابل په ګډون په ګڼو ولایتونو کې پر طالبانو د بريدونو او هغوی ته د مرګ ژوبلي اوښتلو خبرونه ورکړي وو.

معلولینو د ماشومانو د واکسین د کمپاین د بندېدو له خطرونو اندېښنه څرګنده کړې او خبرداری یې ورکړی، چې د دغه بهیر درول به د معلولیت لرونکو کسانو د شمېر د زیاتوالي لامل شي.

د معلولینو د حقونو یو فعال سید محمد یزدان پرست ټینګار وکړ، چې هېڅ اقدام باید په افغانستان کې د پولیو د واکسین د کمپاین د دوام مخه ونه نیسي.

دا خبر په داسې حال کې د طالبانو چارواکو رد کړی، چې تر دې وړاندې اسوشېټېډ پرېس د ملګرو ملتونو په حواله راپور ورکړی و، چې طالبانو د پولیو واکسین کمپاین بند کړی دی.

د پولیو د واکسین کمپاین چارواکو ګارډین ته ویلي، چې طالبانو په ټول افغانستان کې د ښځو د شتون او امنیتي اندېښنو له امله د پولیو کمپاین وځنډاوه.

د طالبانو له بندیزونو سره د هیواد د خلکو د خپګان په دوام د خوست په يوه غونډه کې د دې ډلې لوړپوړي چارواکي له خلګو د مشورو غوښتنه وکړه او د حکومت د ستونزو د هواري لپاره یې د دوی د رایې پر اړتیا ټینګار وکړ.

د کورنیو چارو وزارت مرستیال هم د خوست له اوسېدونکو وغوښتل، چې د دغې ډلې له خوا وضع شوي اصول او مقررات مراعات کړي.

طالبانو د جګړې له لارې واک ترلاسه کړی او په منتخب حکومت او د خلکو په رایو باور نه لري.

دغه طالب چارواکی په داسې حال کې پر رایې او له خلکو سره پر سلا مشورو ټینګار کوي، چې دغې ډلې په څه کم درې کلونو کې د نجونو د زدکړې او د ښځو پر کار بندیز لګولو ته پام نه دی کړی.

د طالبانو د کډوالو او ستنېدونکو چارو وزارت نن په اعلاميه کې د خلیل رحمان حقاني او په افغانستان کې د پاکستان د سفير عبیدلرحمان نظاماني د لیدنې خبر ورکړی.

اعلاميه زیاتوي، چې حقاني په دې ليدنه کې په پاکستان کې د افغان کډوالو د ځوروني ترڅنګ دتګ راتګ پر مهال د ځينو ستونزو یادونه وکړه او له دغه هېواد یې وغوښتل، چې په دې برخه کې د ګاونډيتوب اصل په پام کې ونيسي.

حقاني له پاکستاني سفيره غوښتي، چې کډوال دې د سیاستونو نه قرباني کوي.

«د پاکستان څخه د مهاجرینو په هکله د یوې ګډې او جامع تګلارې غوښتنه کوو، ترڅو د مهاجرینو راتلونکی روښانه او په اړه یې دقیق تصمیمونه ونیول شي.»

په اعلاميه کې د پاکستاني سفير له قوله لیکل شوي، چې «مسایل باید د خبرو او ګډو ناستو له لارې حل کړو.»

په اعلاميه کې نظاماني د کډوالو د ستونزو حل خپل اخلاقي مسوليت بللی او ويلي یې دي، چې له رهبرۍ سره به یې پر حل کار وکړي.

د طالبانو بهرنیو چارو وزیر امير خان متقي بېګاه په کابل کې د بهرنيو هېوادونو له سفيرانو او استازو سره په ناسته کې وويل، له ټولو هېوادونو په تېره له ایران او پاکستان یې تمه دا ده، چې د افغان کډوالو په ستنولو کې له زغم او احتیاط کار واخلي.

متقي د پاکستان او یران یادولو سره هیله وکړه، چې افغان کډوالو ته پکې تکلیف ونه رسېږي او په خپله خوښه ستنېدو ته پرېښودل شي.

د طالبانو چارواکو د څرګندونو سره هممهاله په پاکستان او ایران کې د افغان کډوالو د ځورولو او په زور افغانستان ته د ستنولو راپورونه ډېر شوي دی.

منظور پښتین د پښتنو برخلیک مالومولو لپاره د ۱۱ اکتوبر جرګې ته د خلکو بللو په تکل له څه مهال راهیسې مختلفو سیمو ته سفرونه پیل کړي دي.

ښاغلی پښتین چې له څو ورځو راهیسې په کوهاټ او ورڅېرمه سیمو کې ورته غونډې لري، پرون د هنګو تورې وړۍ ته تللی و.

خو کورمې ته تر تلو یوه ورځ مخکې د دې سیمې ځینې مشرانو ترې وغوښتل چې هلته دې نه ورځي.

ځايي فعالان وايي، دې مشرانو د حکومت په غوښتنه دا کار کړی دی.

خو د دغو مشرانو دا غوښتنه د ځوانو پښتنو فعالانو له مخالفت سره مخ شوه او له خلکو یې وغوښتل چې د منظور تود هرکلی وکړي.

د عبدالخالق اورکزي په نوم ټولنیز فعال خپل فیسبوک کې دې مشرانو ته لیکلي: «کورمه د څو کسانو نه ده، بلکې د نږدې اتو لکو پښتنو ده او منظور ته په تمه دي.»

د سید حیدر عباس په نوم بل کس هم د منظور له تګ سره له مخالفو خلکو پوښتنه کړې، چې که ترهګر کورمې ته ورځي، نو منظور پښتون ولې نه شي ورتلی.

د ځايي رسنیو د راپور له مخې د نوموړي د تګ د مخنیوي لپاره د کورمې چارواکو په کوزمه کورمه کې له پنځو کسانو د ډېرو خلکو په غونډو هم بندیز لګولی دی.

خو له دې سره نن منظور پښتین کورمې ته لاړ او د ۱۱ اکتوبر جرګې ته یې خلکو ته بلنه ور کړه.

د نوموړي په غونډه کې پر قومي مشرانو، مدني او ټولنیزو فعالانو او خبریالانو سربېره ډېرو خلکو ګډون درلود.

خواله رسنیو کې ویډیووې او د نوموړي پر شخصي خواله رسنۍ خپاره شوي انځورونه ښيي چې نوموړي ته لوی شمېر خلک ورغلي دي.

ویل کېږي ښاغلي پښتون تر دې وروسته بره کورمه کې په مرکز پاړه څینار کې غونډه لري.

کورمه له لسیزو راهیسې د شیعه او سني فرقو د تاوتریخوالي ښکار ده.