د حزب الله یو نامعلوم چارواکي رویټرز خبري اژانس ته ویلي، د دې ډلې پر مخابراتي تجهیزاتو وروستي برید کې د حزب الله ۱۵۰۰ غړي د ټپونو له امله له فعالیته وتلي دي. د حزب الله دغه ډېری غړي پر سترګو ړانده او یا یې لاسونه پرې شوي دي.
که څه هم دا ټپونه یو لوی ګوزار ګڼل کیږي؛ خو یوازې د حزب الله د فعالو غړو یوه کوچنۍ برخه پکې شامله ده.
په دې وروستیو کې د امریکا په کانګرس کې یو راپور وړاندې شو، چې د حزب الله د جنګیالیو شمېر له ۴۰ زرو تر ۵۰ زرو اټکل شوی دی.
د حزب الله مشر حسن نصرالله وايي، دغه ډله سل زره کسان لري.
د تېرې اونۍ د سې شنبې او چهارشنبې په ورځو کې د حزب الله ډلې پيجر او بېسیم وسایل په همغږو عملیاتو کې وچاودېدل.
حزب الله د چاودنې پړه پر اسراييل واچوله، خو تل ابیب تر اوسه رسمي په دې اړه څه نه دي ويلي.
د شمالي وزیرستان په میرعلي بازار کې تېره ورځ د پاکستاني پوځ او ټي ټي پي ترمنځ جکړه وشوه. چې دواړو لوریو ته د مرګ ژوبلې اوښتو تر څنګ، هلته د څارویو او سبزي منډهيي وسوځېده او لسګونه څاروي هم په کې وسوځېدل، چې منظور پښتین او محسن داوړ یې په وړاندې سخت غبرګونونه ښودلي.
د پاکستان ځايي امنیتي چارواکو ادعا کړې وه، چې په دغې جګړه کې د ټي ټي پي څلور وسله وال وژل شوي او پنځه ټپیان شوي. پاکستاني چارواکو په دغه جګړه کې یوازې د دوو پوځیانو ټپي کېدل منلي.
په ميرعلي بازار کې د تېرې ورځې په جګړه کې د څارویو او سبزي منډهيي سوځېدو په اړه د پښتون ژغورنې غورځنګ مشر منظور پښتين غبرګون ښودلی او پخپله ايکس پاڼه یې ليکلي، چې د ناوړه جګړې له امله څاروي هم خوندي پاتې نه شول، هغه وايي «د ميرعلي بازار پېښه د دغه رياست پوځي او طالباني چلند ښيي، هغه لوبه، چې وسله والې ډلې جوړه کړه، جګړه وشوه او وروسته د هغوی د له منځه وړلو په نوم عملیاتو کې ولسي پښتنو ته یې مالي او ځاني زيانونه واړول. د دغه رياست له شر څخه زموږ څاروي هم خوندي نه دي.»
پرون سې شنبه سرچینو افغانستان انټزنشنل ته یوه ویډیو استولې وه چې په دغې جګړه کې د میرعلي بازار کې اور د میوو، سبزي او مال منډهيي ته سخت زیانونه اړولي چې د میوو او سبو تر څنګ لسګونه غواوې په کې ژوندۍ سوځېدلې وې.
دغو سرچینو ویلي وو، په دې جګړه کې له درنو وسلو کار اخیستل شوی او ځينې توغندي د میوې، سبزي او مال منډهيي ترڅنګ د ولسي خلکو پر دوکانونو لګېدلي دی او دغو ځایونو ته یې سخت تاوانونه اړولي دی.
په ميرعلي کې د پاکستاني امنیتي ځواکونو او طالبانو ترمنځ د تېرې ورځې جګړې ته په غبرګون کې د ملي جمهوري غورځنګ مشر محسن داوړ هم پخپله ايکس پاڼه لیکلي، «د پوځ او طالبانو په جګړه کې د سیمې خلک له سختو ستونزو سره مخ شوي، د خلکو مالونه او څاروي ژوندي سوځېدل دا ښيي، چې نړۍ زموږ په سيمه کې د انسانانو په وینو سياست کوي.»
له میرعلي څخه ځايي سرچینو تېره ورځ د تلې درېیمه افغانستان انټرنشنل ته وویل چې د پاکستاني پوځ او ټي ټي پي وسلوالو ترمنځ جګړه د ځايي وخت له غرمې مخکې ۱۰ بجې پیل شوه چې په دغې جګړې کې د خلکو کورونه، د څارویو، میوو او سبو منډهيي اور واخيست او هر څه په خاورو او ايرو بدل شول.
د سرچینو پر وینا یوازې په مال منډهيي کې شاوخوا ۳۰ څاروي ژوندي سوځېدلي دي.
له هغه وروسته چې په خواله رسنیو کې د څارویو او سبو د منډهيي سوځېدو ویډیوګانې لاس په لاس شوې او پراخ غبرګونونه یې راوپارول، په خواله رسنیو کې د پاکستان امنیتي ادارو ته منسوبو ځينې پاڼو د میرعلي پېښه د ټي ټي پي او پښتون ژغورنې غورځنګ کار وباله.
خو د سیمې خلکو تېره ورځ ویلي وو، چې د میرعلي بازار هغه وخت اور واخیست چې د پاکستاني امنیتي ځواکونو له لوري پر دغه بازار د وسله والو د ځپلو په پار توغندي ولګېدل.
د ټېک ټاک شرکت خپلو کارونکو ته د عاید نوي فرصتونه چمتو کوي او د سبسکرایب فیچر ته ټولو جوړونکو ته لاسرسی ورکول کیږي. مخکې دا فیچر یوازې پر ټېک ټاک کې په ژوندۍ بڼه د ګډون کاروونکو لپاره و.
اوس د سبسکرایب فیچر له لارې هر هغه کس چې عمر یې اتلس یا له اتلسو څخه پورته وي د پیسو ګټلو فرصت شته؛ مګر ځیني شرایط هم موجود دي.
د کارونکي فالورز باید لږ تر لږه ۱۰ زره وي او د یوه کال څخه په لږه موده کې باید یوه ویډیو یې له ۱۰۰ زرو ډېره لیدل شوې وي.
ټېک ټاک په ۲۰۲۰ کال کې سبسکرایب فیچر په لایف کې د یوټیوب د ننګولو لپاره جوړ کړی و.
ټېک ټاک د سبسکرایب لپاره درې کټګورۍ وړاندیز کړي.
سبسکرایب کارونکو ته د خپلې خوښې ویډیو جوړونکو د منځپانګې، چینلونو او سټیکرونو ته د لاسرسي لپاره میاشتنی معاش ورکوي.
د دې وسیلې له لارې کارونکي به وکولی شي د ځانګړې منځپانګې د فیس لپاره پیجونو او نور ډېر څه له لارې پیسې وګټي.
کارونکې له خپلو پېرودونکو سره چټ هم کولی شي.
د سبسکرایب فیچر په برازیل، فرانسه، جرمني، هسپانیه، بریتانیا، اندونیزیا، ایټالیا، جاپان، سویلي کوریا او متحده ایالاتو کې پیل کیږي.
ټېک ټاک کمپنې به دا فیچر په نورو هېوادونو کې وروسته فعاله کړي.
د امریکا د بهرنیو چارو وزیر چې له افغانستانه د دغه هېواد د وتلو په اړه د وضاحت لپاره د امریکا د استازو جرګې د بهرنیو اړیکو کمېټې ته ورغوښتل شوی و، په دې غونډه کې ګډون ونه کړ.
د امریکا د بهرنیو چارو وزارت وویل، چې بلېنکن د ملګرو ملتونو د غونډې پر مهال نه شي کولی د شاهدی لپاره حاضر شي.
دغې کمېټې مخکې له بلېنکن څخه غوښتي وو، چې وږي په ۲۹مه نېټه حاضر شي؛ خو د امریکا د بهرنیو چارو وزارت په ځواب کې ویلي وو، چې ښاغلی بلېنکن غوښتل شویو نېټو کې د شهادت لپاره نه شي ورتللی.
د امریکا د استازو جرګې د بهرنیو اړیکو کمېټه چې مشري یې د جمهوري غوښتونکي ګوند څخه مایکل مکال پر غاړه لري، له ډېرې مودې راهیسې له افغانستانه د امریکا د وتلو په اړه څېړنه کوي.
د امریکا د بهرنیو چارو وزارت له دې مخکې ویلي وو، چې بلېنکن د امریکا کانګرس ته د افغانستان په اړه له ۱۴ ځلو څخه زیات شاهدي ورکړې دی.
د امریکا د ولسمشریزو ټاکنو د کمپاین له پیل راهیسي له افغانستانه د دغه هېواد د ځواکونو د وتلو په تړاو پېښې په سیاسي مسالې بدلې شوې دي.
د ترکیې ولسمشر رجب طیب اردوغان د ملګرو ملتونو په ۷۹مې غونډه کې د اسراییل چلند ته په اشارې سره وویل: «نړۍواله ټولنه باید د فلسطیني ملکي وګړو د ساتنې میکانیزم رامنځته کړي.» هغه د خبرو په دوام کې دې ته هم اشاره وکړه، چې ترکیه هغه هېواد دی، چې غزې ته تر ټولو زیاتې مرستې رسوي.
هغه وویل: «موږ د لبنان د خلکو او د لبنان د حکومت تر څنګ ولاړ یو. موږ حقیقت هغه ډول چې دی وینو.»
اردوغان همدا شان د دایمي اوربند اړتیا ته اشاره وکړه او ویې ویل: «یرغمل شوي او بندیان باید تبادله شي او غزې ته بشردوستانه مرستې باید په پرله پسې او دوامداره توګه ورسیږي.»
د ترکیې ولسمشر رجب طیب اردوغان په ملګروملتونو کې په خپله وینا کې غزه کې د لویدیځې نړۍ ارزښتونو ته په اشارې سره وویل: «د اسراییل حکومت د بشر اساسي حقوقه له پامه غورځوي.»
د ترکیې ولسمشر د خپلو خبرو په دوام دې ته په اشارې سره چې د اسراییل د حکومت ملاتړ باید ختم شي وویل: «هغو هېوادونو ته چې له قید او شرط پرته له اسراییل څخه ملاتړ کوي غواړو پیغام ورکړو. تر کله غواړئ چې د دې بې شرمانه قتل عام شهدان اوسئ؟»
اردوغان دې ته په پام سره چې د اسراییل لپاره د یوې ډلې هېوادونو ملاتړ د دې تیري د دوام لامل دی خبرداری ورکړ: «هغه هېوادونه چې د اسراییل په اړه ویلو ته څه لري، په ښکاره ډول په جرم کې شریک دي.»
ترکیه یو له هغوی هېوادونو څخه ده، چې په غزه کې یې روانه جګړه غندلې او اسراییل یې د فلسطین د عامه خلکو په وژلو مجرم ګڼلی دی.
د سرېلانکا نوي ولسمشر انورا کومارا دیسانایاکه د سې شنبې په ورځ د هېواد په تاریخ کې د درېیم ځل لپاره یوه ښځه د لومړۍ وزیرې په توګه وټاکله. هاریني ماراسوري لومړنۍ یوه علمي فعاله ده، چې د سرېلانکا د لومړۍ وزیرې په توګه وټاکل شوه.
د پوهنتون دغه پخوانۍ استاده او د ولسي جرګې غړې به د عدلیې، پوهنې او کار وزارتونو مشري هم کوي.
د سرېلانکا نوي ولسمشر او لومړۍ وزیرې دواړه د کیڼ اړخه او د ملي خلکو د ځواک ایتلاف برخه ده، چې د هېواد په پارلمان کې له ۲۲۵ څوکۍ یوازې ۳ څوکۍ په واک کې لري.
د سرېلانکا د موقتې کابینې پاتې چوکۍ هم د دغه ګوند د نورو دوو استازو ترمنځ ویشل شوي دي.
د ګوند غړي نامال کاروناراتنه د سې شنبې په ورځ خبریالانو ته وویل: "موږ به د سرېلانکا په تاریخ کې تر ټولو کوچنۍ کابینه ولرو ".
په ورته وخت کې په راتلونکو ورځو کې د احتمالي پارلماني ټاکنو د ترسره کېدو په اړه ګونګوسې هم زور اخیستی دی.
د سرېلانکا ولسمشر لا دمخه اعلان کړی، چې د ټاکل کېدو وروسته به ډیر ژر پارلمان منحل کړي. ځکه د هغه په وینا: "د داسې پارلمان دوام چې د خلکو له هیلو سره سم نه وي، ګټور نه دی."
د اغلې ماراسوري دنده د یوې ټولنیزې فعالې په توګه په ۲۰۱۱ کې پیل شوه؛ کله چې هغې د وړیا زده کړې غوښتنې په لاریونونو کې برخه واخیسته.
هغې د ۲۰۱۹ د ولسمشریزو ټاکنو په کمپاین کې د دیسانایاکه تر څنګ وه ، چې یوازې ۳٪ رایې یې ترلاسه کړې وې.
دا ۵۴ کلنه ښځه اوس د ځوانانو د ودې، د ماشومانو د ملاتړ او د جنډر نابرابرۍ د ملاتړ لپاره پېژندل کیږي.
د هغې څخه مخکې دوه نورې میرمنې، سریماوو بندراناییک او چندریکا بندراناییک کمارتونګا، چې دواړه یې له سیاست سره کورنۍ اړیکې درلودې، لومړۍ وزیرانې وې.
دا په داسې حال کې ده، چې د ۲۰۰۰ کال راهیسې هېڅ ښځې دا رول نه دی ترسره کړی.
