د افغانستان کرېکټ بورډ د افغان ابدالیانو په دویمه تمریناتي شل اوریزه لوبه کې عمان ته د ماتې ورکولو خبر ورکړ. د افغانستان کرېکټ بورډ پر فېسبوک لیکلي، چې افغان ابدالیان لوبډلې د دوه تمریناتي شل اوریزو لوبلړیو په دویمه لوبه کې د کوربه هیواد عمان لوبډلې ته ماتې ورکړه.
ویل کېږي، چې افغان لوبډلې په دغه لوبه کې د محمد غضنفر، کریم جنت او فریدون داودزي د غوره توپ اچونې په مرسته له خپلو ۱۹۰ منډو دفاع وکړه او د ۶ منډو په توپیر یې بریا خپله کړه.
د افغانستان کرېکټ بورډ دغه راز زیاته کړې ده، چې د عمان پر وړاندې د دې دوه تمریناتي شل اوریزو سیالیو وروسته به افغان لوبډله د کوربه هیواد عمان او هانګ کانګ لوبډلو پر وړاندې په یوه درې اړخیزه لوبلړۍ کې ګډون وکړي.
د دغو سیالیو د مهالوېش له مخې به افغان ابدالیان په خپله لومړۍ لوبه کې د راتلونکې یکشنبې په ورځ د هانګ کانګ پر وړاندې د سیالۍ ډګر ته ولاړ شي.
دا په داسې حال کې ده، چې د افغانستان الف کرېکټ لوبډلې بیا د عمان الف کرېکټ لوبډلې په وړاندې د اوو وېکټو په توپیر ماتې خوړلې وه.