د طالبانو د تخار ولايت د امنيې قوماندانۍ مطبوعاتي دفتر وویل، چې د دغې ډلې غړو د یاد ولايت په چاه اب ولسوالۍ کې د موسيقۍ د غږولو په تور پنځه کسان نيولي دي. طالبانو ویلي، دغه کسان یې د موسیقۍ د غږولو پر مهال نیولي دي.
طالبانو ويلي، چې دغه کسان يې د شنبې په شپه (د تلې ۲۱مه) له يوه کور څخه نيولي دي.
طالبانو د موسیقۍ پر غږولو او نشرولو بندیز لګولی او له درېیو کلونو راهیسې یې د موسیقۍ د غږولو په تور ګڼ شمېر کسان نیولي او په ټول هېواد کې یې د موسیقۍ ډېر وسایل راټول او سوځولي دي.
د فرانسې د ترهګرۍ ضد څارنوالۍ ویلي، چې یو افغان یې د «ترهګرۍ او د یو مشکوک برید د پلانولو» په تور د پلټنو لپاره نیولی دی. چارواکي وايي، چې د «فوټبال په لوبغالي یا یو سوداګريز مارکېټ کې د خلکو په نښه کولو» پلان ظاهرا له دغه افغان شکمن سره تړاو لري.
دغه ۲۲ کلن افغان شکمن د هغو دریو کسانو په ډله کې دی، چې د چارواکو په وینا د دې اونۍ په پیل کې په تولوز کې نیول شوي وو.
له نوموړي سره دوه نور نیول شوي کسان خوشي شوي دي.
چارواکي وايي، وروسته له هغې، چې د سپټمبر په ۲۷کې څېړنې پیل شوې «د تاوتریخوالی یو پلان شوی عمل چې د فوټبال په سټیډیم یا یو سوداګريز مارکېټ کې د افرادو په نښه کول» وموندل شو، چې ظاهرا له افغان شکمن سره تړاو لري.
چارواکو زیاته کړه، چې دوی «ډیری عناصر» موندلي، چې په ښکاره ډول دا کس د «راډیکالزم» او «داعش ایډیالوژۍ» سره تړاو لري.
د شانګهای د همکارۍ سازمان په غونډه کې چې د سه شنبې په ورځ (د تلې په ۲۴مه) او د چهارشنبې په ورځ (د تلې په ۲۵مه) په پاکستان کې جوړیږي، طالبانو ته بلنه نه ده ورکړل شوې. د پاکستاني رسنیو د راپورونو له مخې د دغه سازمان سکرتریت طالبانو ته هیڅ بلنه نه ده لېږلې.
تر اوسه هېڅ هېواد د طالبانو اداره د افغانستان د مشروع حکومت په توګه په رسمیت نه ده پېژندلې.
ایکسپریس ټریبیون د ډیپلوماټیکو سرچینو په حواله راپور ورکړی چې د شانګهای د همکاریو په سازمان کې د افغانستان غړیتوب د ۲۰۲۱ کال د سپټمبر له میاشتې راهیسې، وروسته له هغه چې طالبان بیا په کابل حاکم شو، ځنډول شوی دی.
افغانستان د ۲۰۱۲ کال د جون په ۷ مه د شانګهای د همکارۍ سازمان د څارونکي غړي په توګه ومنل شو.
اسلام اباد د دې غونډې د کوربه په توګه تمه لري، چې د بېلا بېلو هېوادونو د مشرانو او شاوخوا ۲۰۰ پلاويو هرکلی وکړي.
د طالبانو د ادارې پرخلاف د منګولیا حکومت د څارونکي هیواد په توګه دغې غونډې ته بلل شوی دی.
د تاجکستان بهرنیو چارو مرستیال وزير سودیک امام د تاجکستان او روسيې په پارلماني فورم کې ويلي، چې د مسکو او دوشنبې ترمنځ امنيتي همکاري د افغانستان پر مسلې متمرکزه ده. نوموړي یادونه کړې، چې د افراطي ډلو د فعالیتونو پراخېدل او د نشه یي توکو د قاچاق زیاتوالی د اندیښنې وړ دي.
د تاجکستان بهرنيو چارو مرستیال وزير سودیک امام د افغانستان وضعت ته په اشارې ويلي، چې د «مذهبي افراطيت نظريه د سيمې په امنيت جدي اغيز کوي.»
د روسيې تاس خبري اژانس د نوموړی له قوله زياتوي: «د لويديځ ايتلاف له وتلو وروسته په افغانستان کې وضعيت د اندېښنې وړ دى او هلته روان بهيرونه ډېر متضاد دي.»
امام په افغانستان کې د افراطي ډلو د فعاليت د پراختيا او نشه يي توکو د قاچاق د زياتوالي په اړه اندېښنه ښودلې او ټينګار یې وکړ: « زموږ هېوادونه موافق دي، چې د افغانستان د ټولو سیاسي او قومي قوتونو د استازو په ګډون د يوه ټول شموله حکومت د جوړولو په موخه د هېواد د سوله ييز پرمختګ د تضمين لپاره سوله ييزې خبرې وکړي.»
سودیک امام له افغانانو سره د مرستې پر کولو ټينګار کړی او ويلي، چې د یوه ګاونډي په توګه يې د خوړو، برېښنا او له افغانستان سره د سرحدي بازارونو فعالیت ته زمېنه برابره کړې.
د جرمني دولتي مرستندویه ادارې «جي ای زېډ» ځینو افغان کارمنانو افغانستان انټرنشنل ته وویل، د روان میلادي کال ترپایه به دغه مرستندویه اداره وتړل او د دوی ژوند له خطر سره مخ شي. دوی وايي یو افغان همکار یې د جاسوسۍ په تور له طالبانو سره زنداني دی او درې نور خوشي شوي دي.
د جی ای زیډ ځینو کارمنانو نن د یکشنبې په ورځ «د تلې ۲۱مه» افغانستان انټرنشنل ته وویل چې دوی له څه مودې راهسې د جرمني مرستندویه ادارې سره په دې خبرو بوخت دي، چې د کابل په پای کې د دې ادارې تړل کېدو سره د افغان کارمنانو سرنوست به څه کیږي.
دوی وايی جي ای زیډ د کاري قرارداد پرمهال په شفاهي ډول ورته ویلي و، چې د ادارې تړل کېدو سره جي ای زید جرمني ته د افغان کارمنانو د انتقال مسوولیت نه لري.
دوی له نومښودنې پرته وايي، چې د طالبانو استخباراتو د جاسوسی په تور د دوی څلور افغان همکاران نیولي وو، چې درې خوشي او یو اوس هم په زندان کې بې سرنوشته پروت دی.
دوی زیاتوي د طالبانو له زندانه د خوشې کېدو وروسته دغه درې کسان اسلام اباد ته انتقال شوي دي تر څو جرمني ته یې ولېږي.
د جرمني جي ای زیډ مرستندویه ادارې یو افغان کارمند وویل:« د جی ای زیډ د افغانستان مشر د ادارې کارمنانو ته په یو ناسته کې وویل چې په دوه دلیلونو په افغانستان کې روان کال ترپایه خپل دفتر تړو، لومړی دا چې زمونږ کارمندان امنیت نه لري او بله دا چې طالبانو زمونږ شتون غیرقانوني اعلان کړی دی.»
د جرمني د مرستندویه ادارې «GIZ» د رسنیو مسوولانو د افغانستان انټرنشنل د یوه برېښنا لیک په ځواب کې تایید کړې ده، چې تر ۲۰۲۵ کال پورې دغه اداره خپل کار افغانستان پای ته رسوي خو د دوی پروژې د نورو غیر دولتي مرستندویه ادارو له لارې پرمخ وړي.
خو جي ای زیډ په افغانستان کې د خپلو افغان کارمنانو د سرنوست په اړه له څه ویلو ډډه کړې ده.
د لیندۍ په ۵مه د جرمني د اقتصادي همکارۍ او پراختیا وزارت یوې ویاندې اسوشیتیډ پرېس خبري اژانس ته منلې وه، چې د (GIZ) سیمه ییز کارکوونکي لا هم د طالبانو په توقیف کې دي؛ خو زیاته کړې یې وه چې په رسمي توګه دوی ته لا نه دي ويل شوي، چې دغه کسان ولې نیول شوي دي.
د جرمني د نړۍوالې همکارۍ اداره یا GIZ د دغه په هېواد حکومت پورې تړلې اداره ده.
دغه اداره د نړۍ په شاوخوا ۱۲۰ هېوادونو کې د "اقتصادي پراختیا، د کارموندنې ودې، انرژي او چاپیریال، سولې او امنیت" برخو کې پروژې او خدمات وړاندې کوي.
د طالبانو د کډوالو او بېرته راستنېدونکو چارو وزارت وایي، چې د عراق هېواد له زندانونو ۲۵ خوشې شوي افغان بندیان (د تلې په ۲۰مه نېټه) هېواد ته راستانه شول.
دغه وزارت د یوې خبرپاڼې په خپرولو سره ویلي، چې دغه افغانان د قانوني اسنادو د نه لرلو له امله بندیان شوي وو.
خبرپاڼه زیاتوي، چې دغه کسان د عراق په بېلابېلو زندانونو کې شاوخوا شپږ میاشتې بندیان وو.
د خبرپاڼې له مخې، دغه کسان د ایران له لارې افغانستان ته ستنول شوي دي.
د خبرپاڼې په وروستۍ برخه کې راغلي، چې دغه کسان د نیمروز ولایت د کډوالو ادارې سره تر نوملینکې وروسته د مرستو ترلاسه کولو په موخه د کډوالۍ نړۍوال سازمان ته ورپېژندل شوي دي.
تر دې درې ورځې وړاندې د طالبانو د کډوالو او بېرته راستنېدونکو چارو وزارت ویلی و، چې د پاکستان له زندانونو ۳۰ تنه افغانان خوشې شوي او (د تلې په ۱۷مه نېټه) بېرته خپل هېواد ته ستانه شوي دي.
دغه وزارت د یوې خبرپاڼې په خپرولو سره ویلي و، چې دغه افغانان د قانوني اسنادو د نه لرلو له امله د پاکستان په زندانونو کې له ۴۰ ورځو تر ۲ میاشتو پورې بندیان وو.
