جنوبي وزیرستان کې د جومات دروازه کې چاودنه شوې
د خیبر پښتونخوا ایالت د جنوبي وزیرستان د برمل ولسوالۍ په اعظم ورسک کې د جومات په دروازه کې د یوې چاودنې له امله دوه تنه وژل شوي او شپږ نور ټپیان دي.
د خیبر پښتونخوا ایالت د جنوبي وزیرستان د برمل ولسوالۍ په اعظم ورسک کې د جومات په دروازه کې د یوې چاودنې له امله دوه تنه وژل شوي او شپږ نور ټپیان دي.
سیمه ییز پولیس چارواکي وايي، چې چاودنه د شهزاده جومات پر وړاندې شوې او هدف یې هم د جومات ملا امام او د جمعیت علمای اسلام غړی مولانا شهزاده ترابي و.
د پاکستان استخباراتو یوې تبلیغاتي پاڼې په خواله رسنۍ اېکس کې د چاودنې د شېبې تصویر خپور کړی او ویلي یې دي، چې "خوارجو" په جنوبي وزیرستان کې یو جومات په نښه کړی دی.
په دې پاڼه کې په خپاره شوي یادښت کې ویل شوي چې د دغه برید هدف د جمعیت علمای اسلام یو مشر او مبلغ مولانا شهزاده خان ترابي و.
د سیمې خلک وايي، د پېښې ټپیان د واڼه روغتون ته لېږدول شوي دي.
امنيتي ځواکونو سيمه کلابنده کړې او د بريد په اړه پلټنې پيل شوې دي.
دا د پاکستان د مذهبي ډلو پر مشرانو دویم برید دی چې په تېرو څو ورځو کې ترسره کیږي.
تروسه کومې وسلوالې ډلې ددې پیښې پړه په غاړه نه ده اخیستې.
دوه ورځې وړاندې داعش خراسان په یوه برید کې د جماعت اسلامي د باجوړ ولسوالۍ مسوول صوفي حمید د وژلو پړه پر غاړه واخېسته.
