د پاکستان له ۱۹ کلنو کم عمره کرېکټ ملي لوبډلې نن د کرېکټ اسيايي شورا اړوند اسیا جام سياليو کې په خپله لومړنۍ لوبه کې د هند لوبډلې ته د ۴۳ منډو په توپير ماتې ورکړه. پاکستاني لوبغاړو شهزيب خان ۱۵۹ او عثمان خان ۶۰ منډې وکړې او لوبډله یې تر بريا ورسوله.
د پاکستان له ۱۹ کلنو کم عمره ملي لوبډلې د همدغې سيالۍ پچه وګټله او لومړۍ يې توپوهنه غوره کړه.
د پاکستان لوبډلې په ۵۰ اورنو کې د خپلو ۷ لوبغاړو په سوځېدو ۲۸۲ منډې هدف وټاکه.
په هندي توپ اچوونکو کې سمارت نګاراج ۳ او ایوش مهاتري ۲ پاکستاني لوبغاړي وسوځول.
د لوبې په دويمه برخه کې هند لوبډلې په ۴۷.۱ اور کې د خپلو ټولو لوبغاړو په سوځېدو ۲۳۸ منډې جوړې کړې او دغه سيالې یې د ۴۳ منډو په توپير وبايلله.
د پاکستان لوبډلې په توپ اچونه کې علي رضا درې، عبدالسبحان او فهام الحق دوه – دوه هندي لوبغاړي وسوځول.
په الف ګروپ کې پاکستان، هند، متحده عربي امارات او جاپان د ۱۹ کلنو کم عمره لوبډلې يو د بل سره لوبيږي.
دا جام چې پرون جمعه پیل شو، چې پایلوبه یې د ډيسمبر پر اتمه کېږي.
تېر کال د دې جام پایلوبه کې بنګلدېش متحده عربي اماراتو ته په ماتې ور کولو دا اتلولي خپله کړې وه.
