نبیل: نړۍ ته معلومه ده چې د ظلم او ځپلو دوام ترخه پایله لري
د تېر حکومت د ملي امنیت پخواني مشر رحمت الله نبیل د طالبانو له خوا د طبي انسټیټونونو د تړل کېدو په غبرګون وویل: «نړۍ ته معلومه ده چې د ظلم او ځپلو دوام ترخه پایله لري.»
د تېر حکومت د ملي امنیت پخواني مشر رحمت الله نبیل د طالبانو له خوا د طبي انسټیټونونو د تړل کېدو په غبرګون وویل: «نړۍ ته معلومه ده چې د ظلم او ځپلو دوام ترخه پایله لري.»
نوموړي په خپل اېکس کې لیکلي، چې طالبانو د نجونو پر مخ د طبي انسټیټیوټونو د دروازو په بندولو سره بیا ځلې وښوده، چې دوی نه یوازې د زده کړو او پرمختګ دوښمنان دي، بلکې د وخت او تاریخ په وړاندې په یوه نه پایېدونکي مبارزه کې هم ښکېل دي.
د ښاغلي نبیل په خبره، د طالبانو دغه پرېکړه د افغانستان د ښځو او نجونو راتلونکی تباه کوي او د دوی د حکومت عمر هم لنډوي.
د تېر حکومت د ملي امنیت یاد پخوانی مشر همداراز زیاتوي: «طالبان په دغو کړنو سره د خلکو د غوسې او وېښېدو تخم کري او یوه ورځ به دغه تیارې په روښنایي بدلې شي.»
رحمت الله نبیل په داسې حال کې دغه څرګندونې کوي، چې د طالبانو مشر ملا هبت الله اخوندزاده د دوشنبې په ورځ د یوه فرمان په ترڅ کې د هېواد په ټولو طبي انسټیټیوټونو کې د نجونو پر زده کړو بندیز ولګاوه.
سره له دې چې د نوموړي دغه فرمان په کور دننه او بهر کې له پراخو غبرګونونو سره مخ شوی دی، خو د طالبانو د عامې روغتیا وزیر نور جلال جلالي د «دودیز طب» پر اهمیت ټینګار وکړ.
نوموړي چین ته د خپل سفر په ترڅ کې له طالبانو سره د «دوديز طب» په برخه کې د دغه هېواد د همکارۍ غوښتنه وکړه.
طالبانو پر افغانستان له واکمنېدو وروسته لومړۍ له شپږم ټولګي پورته د نجونو پر ښوونځيو، بیا پر پوهنتونونو او اوس هم پر طبي انسټیټیوټونو بندیزونه لګولی دی.
پر دې سربېره طالبانو په دولتي او غیر دولتي ادارو کې د ښځو په کار کولو، پارک تګ، له محرم پرته په سفرونو، ورزش او په سیاسي او مدني مشارکت هم محدودیتونه وضع کړي دي.
که څه هم د افغانانو په ګډون د نړۍ ټولو هېوادونو په وار - وار سره له دې ډلې غوښتي، چې د ښځو پروړاندې سخت دریځۍ بندې کړي، خو طالب چارواکي وایي چې دوی د اسلامي قوانینو او شریعت پربنسټ چارې پرمخ بیایي.