د پاکستان د ترهګرۍ سره د مبارزې اداره: له ۲۰۲۱ کال راهیسې ۲۰ تنه چینایان وژل شوي دي

دغې ادارې ویلي په همدغې موده کې د چینایي وګړو پر ضد ۱۴ بریدونه د پاکستان په بېلابېلو برخو کې ترسره شویدي.

د پاکستان د ترهګرۍ په وړاندې د مبارزې مشر عثمان د سې شنبې په ورځ د لیندۍ په ۲۰ مه د پارلمان د نوښتونو، پراختیا او د تګلارو د جوړولو کمېټې ته وویل چې له ۲۰۲۱ کال راهیسې د چینایي وګړو پر ضد اته بریدونه په سند، څلور په بلوچستان او دوه بریدونه په خیبر پښتونخوا کې شویدي.

ډان ورځپاڼې د سې شنبې په ورځ د لیندۍ په شلمه د دغې ادارې د چارواکو له خولې راپور ورکړ چې په دغو ترهګریزو بریدونو کې اته پاکستانیان هم وژل شوي او ۲۵ نور ټپیان شویدي. د دغې ادارې د مشر په وینا، دمګړۍ د ۲۰ زرو په شاوخوا کې د انجنییرانو او د چین او پاکستان تر منځ د لویې لارې د جوړولو چینایي کارکونکي په دغه هېواد کې مېشت دي.

دغې ادارې ویلي چې د چینایي وګړو امنیت او خوندیتوب د حکومت په لومړیتوبونو کې دی.

له هغه وروسته چې په سند او خیبر پښتونخوا کې پر چینایي وګړو ترهګریز بریدونه وشول نو د هغوی د خوندیتوب موضوع د چین او پاکستان لپاره اندېښنې زیاتې کړې. دمګړۍ د دواړو هزوادونو تر منځ د خبرو انرو د سر، سر موضوع د چینایي وګړو خوندیتوب دی.
له هغه وروسته چې د خیبر پښتونخوا په داسو سیمه کې د بریښنا د بند پنځه تنه انجنیران ووژل شول او له هغه وروسته بیا د کراچۍ هوایي ډګر ته څېرمه دوه نور چینایي انجنیران ووژل شول، چین له پاکستانه وغوښتل چې د هغوی د کارکونکو خوندیتوب ته پاملرنه زیاته کړي، خو پاکستان هڅه کوي چې د دغو بریدونو مخه ونیسي او په دې توګه د هغوی د امنیت ټینګولو ته ځانګړې پاملرنه وګړي.