د برېتانیا د پارلمان څه باندې ۱۶۰ وکیلانو د یوه لیک په لاسلیکولو سره د انګلنډ او ویلز کرېکټ بورډ څخه غوښتي، چې د طالبانو له خوا "د ښځو او نجونو د وحشتناک ظلم او د دوی د حقونو له منځه وړلو په غبرګون د افغانستان پر وړاندې د راتلونکې میاشت چمپینز ټرافي له سیالیو انکار وکړي.
د انګلستان د نارینه و یو ورځینیو سیالیو لوبډله به د فېبرورۍ په ۲۶ مه په لاهور کې له افغانستان سره مخامخ شي، خو د وېسټ منسټر له خوا له انګلستان کرېکټ بورډ څخه غوښتنه شوې، چې سیالي رد کړي او د ښځو پر حقونو د طالبانو د رژیم د روانو بندیزونو په وړاندې دریځ خپل کړي.
سره له دې چې د افغانستان نارینه ټیم لاهم په ۲۰۲۱ کې د ښځینه ټیم منحل کېدو سره - سره د کرېکټ نړۍوالې شورا له خوا د سیالیو اجازه لري، خو له پارلمان څخه په کلکه یو لیک راپورته شوی، چې د انګلستان کرېکټ بورډ څخه یې غوښتنه کړې، چې خپل اخلاقي اعتراض وکړي.
دغه لیک د کاریګر ګوند د استازې تونیا انتونیازي له خوا لیکل شوی او د هاوس اف کامنز او د هاوس اف لارډز څخه د یوې پراخې پارټي ډلې له خوا لاسلیک شوی دی، چې دا په افغانستان کې د "جنسي تبعیض" په اړه اندېښنې راپورته کوي.
"په لیک کې ویل شوي: «موږ له انګلستان کرېکټ بورډ څخه هم غوښتنه کوو چې د افغانستان په وړاندې له راتلونکې سیالیو انکار وکړي او په پام کې ونیسي، ترڅو روښانه پیغام واستوي چې دا ډول ناوړه سرغړونې به ونه زغملی شي. موږ باید د جنسي تبعیض په وړاندې ودرېږو او موږ له انګلستان کرېکټ بورډ څخه غوښتنه کوو، چې د پیوستون یو قوي پیغام او امید افغان مېرمنو او نجونو ته ورسوي چې د دوی کړاوونه له پامه غورځول شوي نه دي.»
په ۲۰۲۱ کال کې پر افغانستان د طالبانو له واکمنېدو راهیسې د دغې ډلې له خوا په افغان ښځو او نجونو سخت بندیزونه وضع شوي دي.
د نجونو پر وړاندې د زده کړو دروازې تړل شوي، د کار او بیان ازادۍ حق ترې اخیستل شوی او همدا ډول په سپورټ کې د ښځو ګډون په کلکه منع شوی دی.
خو د کرېکټ د نړۍوالې شورا (ای سي سي) د مقرراتو له مخې بشپړ غړي هېوادونه مکلف دي، چې ښځينه کرېکټ لوبډله هم باید ولري.
