د ارغواني شنبو غورځنګ وایي، چې د طالبانو په وړاندې د بندیزونو په بشپړ ډول پلي کولو کې پاتې راتلل د نړۍوالو پالیسیو پر اعتبار منفي اغېزه کړې او دغه بندیزونه یې بې اغېزې کړي دي.
دغه غورځنګ نن سې شنبه (د مرغومي ۱۸مه) پر اېکس پاڼه لیکلي دي: «له همدې امله موږ پر ملګرو ملتونو غږ کوو، چې د ترهګرو سازمانونو یو پراخ نوملړ جوړ کړي او طالبان، حقاني شبکه، القاعده، داعش او نورې ترهګرې ډلې په کې شاملې کړي.»دغه غورځنګ له طالبانو سره د تعامل او ملاتړ د پای ته رسولو غوښتنه کړې.د ارغواني شنبو غورځنګ دا رنکه له ټولو هېوادونو غوښتي، چې د خپلو ترهګرو ډلو له نوملړه دې د طالبانو د نومونو د اېستلو او یا هم د هغوی د حکومت په رسمیت پېژندلو څخه ډډه وکړي.دغه غورځنګ د خپلې لیکنې په وروستۍ کرښه کې یو وار بیا په افغانستان کې د ښځو د ملاتړ غوښتنه کړې.واک ته د طالبانو له رسېدو وروسته د ښځو د حقونو فعالانو وخت ناوخت د طالبانو سره د تعامل په برخه کې د ملګرو ملتونو ترڅنګ د ځینو هېوادونو پر سیاستونو نیوکې کړې دي.
