د جرمونو نړيوالې محکمې د امریکا له لوري د محکمې پر لوی څارنوال کریم خان لیګدلي بندیزونه غندلي دي. سپینې ماڼۍ د دوشنبې په ورځ تایید کړه، چې د جرمونو نړیوالې محکمې څارنوال کریم خان یې تحریم کړی دی.
د جرمونو نړيوالې محکمې نن سې شنبه « د سلواغې ۲۳مه» د امریکا د ولسمشر ډونالډ ټرمپ له خوا د دې محکمې پر لوی څارنوال کریم خان لګېدلو بندیزونو ته غبرګون ښودلی.
یاده محکمه وايي، « محکمه ژمنه کوي چې د ظلمونو او د میلیونونو بې ګناه قربانیانو په ګټه به خپل قضایي ماموریت ته دوام ورکړي.»
د جرمونو نړیوالې محکمې له خپلو ۱۲۵ غړو هېوادونو، مدني ټولنې او د نړۍ له ټولو ملتونو غوښتي، چې د نړیوال عدالت لپاره سره متحد شي.
د ټرمپ د حکم له مخې، کریم خان او د هغه کورنۍ ته اجازه نشته چې امریکا ته سفر وکړي او په امریکا کې د دوی ملکیتونه او بانکي حسابونه ضبط شوي دي.
سپینې ماڼۍ د جرمونو نړیوالې محکمې د څارنوال له خوا د متحده ایالاتو او اسراییل پر وړاندې تورونه "غیر قانوني او بې اساسه" وبلل.
رویټرز درې ورځې وړاندې راپور ورکړ، چې کریم خان د امریکا د بندیزونو په لیست کې شامل شوی دی.
د یادې محکمې لوی څارنوال مخکې ویلي و چې د امریکا بندیزونه به د محکمې پریکړه بدله نه کړي او هیڅوک له قانون څخه پورته نه دي.
بلې خوا، د ټرمپ امریکایي منتقدینو هم خبرداری ورکړ، چې دا بندیزونه به د جنګي جرمونو قربانیانو لپاره عدالت ته د هغوی لاسرسی نور هم ستونزمن کړي.
کریم خان لا دمخه د طالبانو د مشر هبت الله او د دې ډلې د قاضي القضات د نیولو امر صادر کړی دی، خو امریکا په رسمي ډول د دې غوښتنې ملاتړ نه دی کړی.
د طالبانو ددولتي شرکتونو د ریاست د سرچینو په وینا، د دغه قرارداد پروسه شفافه نه ده ترسره شوې او داسې ادعاوې شته چې د یاد ریاست د دفتر رییس مفتي محمد سلیم حقاني دغه قرارداد د ونډې پر اساس سندریلا شرکت ته ورکړی.
د سرچینې د ادعا له مخې، د امارتي[دولتي] شرکتونو لوی ریاست د دفتر ریيس له هر شرکت څخه «شخصي سهم» غواړي او که یې ترلاسه نه کړي، د قرارداد د عملي کولو مخه نیسي. سرچینه زیاتوی، « د دې چارې له امله یوازې هغه شرکتونه چې د مفتي سليم شخصي ګټې تضمین کړي، پرمختګ کولای شي حال دا چې نور تجربه لرونکي شرکتونه د بازار له رقابته بې برخې کېږي».
افغانستان انټرنشنل ته رسېدلي اسناد ښيي، چې د سندریلا د پانګونې کچه ۳۵۰ میلیونه افغانۍ، له ناخالصو عوایدو د دولتي شرکت ونډه ۲۵ سلنه او له خالصو عوایدو ۴۰ سلنه ده. خو پر وړاندې یې د ادې ګروپ پانګونه ۵۵ میلیونه او له خالصو عوایدو د دولتي شرکت ونډه ۵۳ سلنه، د ابراهیم خلیل ۵۶۰ میلیونه پانګونه او د دولتي شرکت ونډه ۵۲سلنه، افغان کمپاونډ سپورټ سرویسز پانګونه له ۷۰۰ میلیونو تر یو میلیارد افغانیو او له خالصو عوایدو د دولتي شرکت ونډه ۴۹ سلنه ده، خو له تجربو، لوړې کچې پانګونې سره سره دغه قرارداد سندریلا ته په کمې پانګونې او ۴۰ سلنه ونډې ورکړل شوی.
د طالبانو د دولتي شرکتونو لوی ریاست یوه کارکوونکي افغانستان انټرنشنل ته وویل، « محمد سلیم حقاني، چې مخکې د بيمې د رياست مشر و، د بيمې سکتور د کمزورۍ عامل ګڼل کیږي، اوس، چې د امارتي شرکتونو د لوی ریاست دفتر رییس دی، هڅه کوي دولتي او خصوصي قراردادونه د خپلو شخصي ګټو لپاره کنټرول کړي.»
سلیم حقاني، سندریلا شرکت او د طالبانو د دولتي شرکتونو لوی ریاست ددغو ادعاوو په اړه تراوسه څه نه دي ویلي.
یاد قرارداد، چې د فبرورۍ په لومړۍ نېټه نافذ شوی، د کابل سرینا هوټل د شل کلن قرارداد له پای ته رسېدو وروسته لاسلیک شوی. د سندریلا ساختماني شرکت، چې یو افغان-جرمنی شرکت دی، ویلي، د هوټل مدیریت لپاره یې لس کلن قرارداد لاسلیک کړی، خو د مالي شرایطو جزئیات یې نه دي څرګند کړي.
د یاد شرکت رییس هارون عظیم فرانس پرېس ته په یوه مرکه کې وویل، چې دا معامله د سرینا هوټل د مخکیني قرارداد تر پای ته رسېدو وروسته لاسلیک شوې ده. نوموړي ویلي، چې سندریلا شرکت له شلو کلونو راهیسې په افغانستان کې فعال دی او د سړکونو جوړولو او کانونو په سکتور کې یې کار کړی دی.
