د اتلانو جام سیالۍ؛ هند اسټرالیا ته په ماتې ورکولو پایلوبې ته ووت
د کرکټ اتلانو جام کې نن هند لوبډلې په څلورو ویکټو اسټرالیا ته ماته ورکړه او پايلوبې ته یې لاره ومونده. هندي توپ وهونکي ویرات کولي ۸۴ منډې وکړې او د لوبې غوره لوبغاړی شو.
د کرکټ اتلانو جام کې نن هند لوبډلې په څلورو ویکټو اسټرالیا ته ماته ورکړه او پايلوبې ته یې لاره ومونده. هندي توپ وهونکي ویرات کولي ۸۴ منډې وکړې او د لوبې غوره لوبغاړی شو.
د کرکټ اتلانو جام د نیمه پایلوبې پچه اسټرالیا لوبډلې وګټله او لومړۍ یې د توپ وهنې پرېکړه وکړه.
اسټرالیا د خپلو ټولو لوبغاړو په سوځېدو په ۴۹.۳ اور کې هند لوبډلې ته ۲۶۵ منډې هدف وټاکه.
د اسټرالیا په لوبډله کې سټېون سمیت تر ټولو ډېري په ۹۶ توپونو ۷۳ منډې وکړې او د هند په توپ اچوونکو کې بيا محمد شمي درې لوبغاړيوسوځول.
هند لوبډلې د خپلو ۶ لوبغاړو په سوځېدو په ۴۸.۱ اور کې دغه هدف پوره کړ او پایلوبې ته لاړ.
سبا چهار شنبه به په دویمه نیمه پايلوبه کې سویلي افريقا او نیوزیلنډ لوبډلې بخت ازمويي.
د فوټسال د ملي لوبډلې روزونکي مجید مرتضوي په یوه مرکه کې وویل، چې برازیل ته د افغانستان د فوټسال ملي لوبډلې سفر لغوه شوی دی.
هغه وویل، چې تر اوسه د لوبغاړو ویزې نه دي صادرې شوي او که نن داسې ونه شي نو برازیل ته به یې سفر لغوه شي.
د فوټسال کمېټې او د افغانستان د فوټبال فډراسیون په دې موضوع چوپتیا غوره کړې.
ټاکل شوې وه، چې د افغانستان د فوټسال ملي لوبډله په برازیل کې د فوټسال په څلور اړخیزو سیالیو کې ګډون وکړي.
دغه سيالۍ د افغانستان، ايران، ګرينلنډ او برازيل د فوټسال ملي ټيمونو په ګډون د ١٤٠٣ کال د کب د مياشتې په ١٣مه نېټه پیل او تر ١٩مې نيټې پورې دوام کوي.
وروسته له هغه چې د افغانستان د فوټبال فډراسیون د ایران د فوټبال د مشر روزونکي مجید مرتضوي قرارداد وغځاوه، دوه اوونۍ وړاندې د دغه روزونکي تر څارنې لاندې د ایران په مشهد ښار کې د افغانستان د فوټسال لوبډلې روزنه پیل شوه.
اوس چې د برازيل د سياليو د پيل وخت را رسېدلى، افغان لوبغاړو تر اوسه د دغه هېواد ويزې نه دي ترلاسه کړي.
ویل کېږي، چې د افغانستان د ملي لوبډلې یو شمېر لوبغاړي د ملي لوبډلې په تمریناتو کې د نه ګډون له امله له خپلو کلبونو سره جدي اختلافات لري.
یو شمېر خبري اژانسونه او خبریالان د برازیل د ویزو نه ترلاسه کول د ملي لوبډلې د مدیرانو، د فوټسال کمېټې او د افغانستان د فوټبال فډراسیون تر منځ د همغږۍ نشتوالی بولي او ادعا کوي، چې د فوټسال کمېټې مسوول د دې ستونزې پړه د فوټسال د ملي لوبډلې مدیر په غاړه اخیستې ده.
مجيد مرتضوي چې د ملي لوبډلې د سفر د نشتوالي او د برازيل د ويزې د نه ترلاسه کولو د لامل په اړه يې په محتاطانه ډول خبرې وکړې وويل، چې په دې مسله کې باید يو مشخص کس ملامت نه شي؛ خو هغه وويل چې ټول لوبغاړي په دې مسله سخت خواشيني دي.
مرتضوي زیاته کړه، چې د برازیل د فوټبال فډراسیون د برازیل په سیالیو کې د افغانستان ګډون ته لېواله دی.
د افغانستان د نوولس کلنو کم عمره ملي لوبډلې د نیپال نوولس کلنې ملي لوبډلې سره د راتلونکو سیالیو لپاره په خوست ولایت کې تمرینات پیل کړي.
کرېکټ بورډ پر خپلې فېسبوک پاڼې لیکلي، دغه روزنیز او تمریناتي کمپ چې د فېبروري میاشتې له لومړۍ نېټې د همدې میاشتې تر ۲۵مې نېټې پورې په خوست کرېکټ لوبغالي کې ترسره شو؛ د نوولس کلنو لوبډلې ۱۹ لوبغاړو پکې ګډون درلود.
له دې وړاندې د ننګرهار ولایت په تمریناتي او روزنیز کمپ کې ۳۰ لوبغاړو ګډون درلود، چې د چاڼ له اړوند لړۍ وروسته پکې ۱۹ لوبغاړي پاتې شول او هغوی ته په خوست کرېکټ لوبغالي کې د ارزونې او چمتووالي کمپ پیل شو.
د یادونې وړ ده، چې له یادو لوبغاړو به راتلونکي کمپ ته وروستي ۱۵ کسان لار ومومي او له هغه وروسته به د نیپال په کوربه توب د یاد هېواد د نوولس کلنو لوبډلې پر وړاندې سیالیو لپاره دغه هېواد ته سفر وکړي او ورپسې به افغان لوبډله د نړۍوال جام سیالیو ته د لارموندنې په پړاو کې ګډون وکړي.
د افغانستان د کرېکټ ملي لوبډلې تکړه او چټک توپ اچوونکي نوین الحق د ښي اوږې په برخه کې د ستونزې له امله عملیات ترسره کړي. د کرېکټ بورډ د معلوماتو له مخې، دغه عملیات په بریا سره پای ته رسېدلي دي.
د افغانستان کرېکټ بورد په خپله فېسبوک پاڼه کې لیکلي، چې نوین الحق له یوې مودې راهیسې د ښي اوږې د یوې برخې له درده رنځېده، چې له امله یې له اړوند ډاکټر سره د سلا مشورې له مخې باید عملیات کړي وای.
کرېکټ بورډ لیکي، تېره ورځ د نوموړي د ښي اوږې د اړوند برخې عملیات په انګلستان هېواد کې په بریا سره ترسره شو.
باید وویل شي، چې د ډاکټر له سپارښتنې سره سم به نوموړی له درې-څلورو اونیو تر درملنې لاندې وي او له هغه وروسته به یې بیا په یاد هېواد کې د اړوند ډاکټر له لوري درملنه کېږي.
نوين الحق د افغانستان د کرېکټ ملي لوبډلې د شل اوریزه کرېکټ چټک توپ اچوونکی دی، چې د افغانستان د ملي لوبډلې ترڅنګ د نړۍ په بېلابېلو تجارتي سیالیو کې هم لوبې ترسره کوي.
د کرېکټ اتلانو جام کې نن سويلي افريقا د ۷ ويکټو په توپير انګلنډ ته ماتې ور کولو سره نيمه پايلوبې ته لاره پيدا کړه. خو د افغانستان کرېکټ ملي لوبډلې په دې سیاليو کې په يوې ماتې، یوې بريا او د یوې لوبې په مساويتوب سره خپل سفر پای ته ورساوه.
په کراچۍ کې د سویلي افريقا او انګلنډ کرېکټ لوبډلو ترمنځ د نن لوبې پچه انګلنډ وګټله او لومړۍ يې د توپوهنې پرېکړه وکړه.
انګلنډ لوبډلې په ۳۸.۲ اور کې د خپلو ټولو لوبغاړو په سوځېدو ۱۸۰ مندې هدف وټاکه.
سویلي افريقا لوبډلې دغه هدف د خپلو دوو لوبغاړو په سوځېدو په ۲۹.۱ اور کې پوره کړ او بريا يې خپله کړه.
که انګلنډ دغه لوبه په لوړ توپير له سویلي افريقا ګتلې وی، نیمه پايلوبې ته د افغانستان د تګ فیصدي ډېرېده.
اوس مهال نیوزيلنډ، هند، سویلي افریفا او اسټرالیا د اتلانو جام نيمه پايلوبو ته لاره پيدا کړې.
د افغانستان کرېکټ ملې لوبډلې په لومړي ځل د کرېکټ ۸ غوره لوبډلو (اتلانو جام) سیاليو کې برخه لرله.
د دې سياليو له الف ګروپ نیوزيلنډ او هند لوبډلې نیمه پايلوبي ته لاړې، پاکستان او بنګلدېش له لوبو بهر شول.
پاکستان او بنګلدېش په دوو – دوو سیاليو کې ماتې خوړلې او د دوی ترمنځ یوه لوبه د باران له کبله لغوه اعلان شوه.
له بي ګروپ سويلي افريقا او اسټراليا نيمه پايلوبو ته لاړل، افغانستان او انګلنډ له لوبو بهر شول.
د بي ګروپ سيالۍ د بارانونو له کبله حساس پړاو ته ولاړې.
افغانستان په لومړۍ سیالۍ کې له سويلي افريقا ماتې وخوړه، په دویمه لوبه کې يې قوي لوبډله انګلنډ ماته کړه او له اسټرالیا سره سیالي يې د باران له کبله لغوه شوه.
د اسټرالیا او سويلي افريقا یوه لوبه هم د باران له کبله مساوي اعلان شوه.
کرېکټ شنوونکي په دې سيالیو کې د افغانستان ګډون او انګلنډ ته ماتې ورته کول له لاسته راوړنو ډک يادوي.
دغه سيالیو کې افغان لوبغاړو نوي تاريخونه جوړ کړل او یو شمېر نویو لوبغاړو په کې تجريبې زياتي کړي.
د مارچ میاشتي په نهمه نېټه به د اتلانو جام پايلوبه تر سره شي.
په لاهور کې د افغانستان او اسټرالیا ترمنځ لوبه د دوامدار اورښت امله بې پایلې اعلان شوه او دواړو لوبډلو ته یوه یوه نمره ورکړل شوه. اسټرالیا له دغه ګروپ نېمه پایلوبې ته ووتله.
افغان لوبډلې په ننۍ لوبه کې لومړۍ توپ وهنه وکړه او د اسټرالیا لوبډلې ته یې د ۲۷۴ منډو هدف ورکړ.
د لوبې په دوهمه پاڼۍ کې اسټرالیا په ۱۲،۵ اورونو کې د یوې ویکټې په زیان سره ۱۰۹ منډې جوړې کړې، خو په لاهور کې د دوامداره اورښت له امله لوبه بې پایلې اعلان شوه او دواړو لوبډلو ته ۱-۱ نمره ورکړل شوه.
د دغه یوې یوې نمرې په ترلاسه کولو سره د اسټرالیا ټولې نمرې څلور شوې او د اتلانو لیګ کې د بي په ګروپ کې نېمه پایلوبې ته ووتله.
اسټرالیا له انګلینډ د لوبې په ګټلو دوې نمرې ترلاسه کړې وي او له سوېلي افریقا سره یې بیا لوبه د باران له امله بې پایلې اعلان شوې وه او یوه نمره ورکول شوې وه.
افغانستان او سوېلي افریقا نېمه پایلوبې ته د تګ چانس لري، خو د افغانستان چانس د سوېلي افریقا په پرتله کم دی.
نېمه پایلوبې ته د افغانستان د تګ چانس
افغانستان خپله لومړۍ لوبه سوېلي افریقا ته د ۱۰۷ منډو په توپير وبایلله چې په دې سره سوېلي افریقا د دوو نمرو ترلاسه کولو ترڅنګ د منډو اوسط هم لوړ شو.
افغانستان هم بیا په دریو لوبو کې یوه بایللې، یوه ګټلې او یوه یې هم مساوي کړې ده. اوس د سوېلي افریقا او افغانستان د ۳-۳ نمرو په لرلو سره مساوي دي خو سوېلي افریقا منډو اوسط ۲،۱۴۰ او افغانستان د منډو اوسط منفي ۰،۹۹۰ دی. په دې ترتیب سره سوېلي افریقا له افغانستان مخکې ده.
خو سبا د سوېلي افریقا او انګلینډ ترمنځ لوبه نېمه پایلوبې ته د ورتګ لپاره د افغانستان او سوېلي افریقا لپاره برخلیک ټاکونکې وي.
که سبا سوېلي افریقا له انګلینډ لوبه وګټې مستقیم نېمه پایلوبې ته ځي او یا هم که لوبه د باران له امله بې پایلې پای ته ورسیږي بیا هم سوېلي افریقا یوه نمره ترلاسه کوي او نېمه پایلوبې ته ځي.
که سبا د انګلینډ لوبډله له سوېلي افریقا د ۲۰۰ په شاوخوا منډو په توپیر لوبه وګټې نو افغانستان ته به د نېمه پایلوبې د ورتګ چانس پیدا شي او که سوېلي افریقا تر دوه سوه د کمو منډو په توپير لوبه وبایلي نو د اتلانو جام کې د افغانستان سفر پای ته رسیدلی دی.