په جلال اباد کې د ایران جنرال کونسل بهرام جمالي ويلي، چې په دغه ولایت کې هره ورځ ۵۰۰ کسانو ته د سیاحت وېزې ورکوي. نوموړی وايي، د افغانستان له ختيزو ولایتونو سره د اداري اړیکو ټينګول او پراخول یې لومړیتوب دی.
ایراني رسنیو رپوټ ور کړی، چې په ننګرهار کې د ایران کوسنلګرۍ د وېزو په ورکولو کې اسانتياوې رامنځته کړې دي.
ایسنا په جلال اباد کې د ایران د کونسل بهرام جمالي له قوله ویلي، چې د قانوني مراحلو له طي کولو وروسته په ۲۴ ساعتونو کې وېزې ورکول کيږي.
نوموړي په دې اړه زياته کړې: «د پخوا په پرتله د ايران د ويزې غوښتونکو لپاره زياتې اسانتياوې برابرې شوې دي. د ایران ویزه به د قانوني پروسیجرونو له تیریدو وروسته په ۲۴ ساعتونو کې صادريږي.»
په ایران کې د افغان کډوالو اوسېدل په ځینو شرایطو کې ممکن دي، خو دغه موضوع تل په دغه هېواد کې له پراخو مخالفتونو او غبرګونونو سره مخ شوې ده.
ایران پر افغان کډوالو سخت بندیزونه لګولي او له تېرو څو مياشتو څخه يې کډوالو ته له دغه هېواده د وتلو خبرداري ورکړي.
