د پښتونخوا د مشهور دیني عالم مفتي منیر شاکر د وژل کېدو په اړه د افغانستان یو شمېر پخوانیو چارواکو او په پښتونخوا کې د پښتون ژغورنې غورځنګ غړو سخت غبرګونونه ښودلي او وايي، د پښتون قام په خلاف «جنګ اعلان شوی دی.»
د پښتون ژغورنې غورځنګ د مرکزي کمیټې غړي حنیف پښتین د مفتي منیر شاکر د ژول کېدو په غبرګون په اېکسپاڼه لیکلي: «د مفتي منیر شهادت نه لومړی شهادت دی او نه به هم وروستی شي.»
نوموړی وايي، د پښتو قام په خلاف جنګ اعلان شوی او ځوانان، قومي مشران او دیني عالمان پکې وژل کیږي. ښاغلی پښتین همدارنګه زیاتوي، چې راتلونکي میاشتې به نورې هم خونړۍ وي.
همدارنګه د افغانستان د مخکنی جمهوري نظام د خوست او پکتیا والي حلیم فدايي بیا وايي، دا چې مفتي شاکر د پاکستان په ادارو سختي نیوکې کولي، د رواجي ملایانو سرسخت مخالف و او له دین یې روایتي تعبیر چلنجاوه، ښايي په روغتون کې په قصدي توګه وژل شوی وي.
همدارنګه د تېر جمهوري نظام د ننګرهار والي ضیاالحق امرخیل مفتي شاکر ژبور او ز ور دیني عالم بللی:«د ژبور او با جرئته دیني عالم مفتي منير شاکر شهادت او هغه هم د خدای ج په کور يعنې جومات کې دردوونکی او خواشینونکی دی.»
د مفتی منیر شاکر د وژل کېدو د خبر له خپریدو وروسته د ټولنیزو رسنیو کاروونکو هم سخت غبرګونونه ښودلي دي.
د ذاکیم خان وزیر په نوم یوه ځوان پر اېکس پاڼه لیکلي، د مفتي منیر شاکر وژنه د ټولې پښتونخوا لپاره یوه لویه ضایعه ده.
د ټولنیزو رسنیو ډیری کارنو ښاغلی شاکر د حق اواز بللی او وايي، چې لومړنی ملا و چې د جومات پر منبر به یې د پښتنو د حق غږ پورته کاوه.
مفتي منیر شاکر مازیګر لمونځ لپاره جومات ته روان و چې چاودنه پرې وشوه او په روغتون کې د درملني پرمهال مړ شو.
مفتي منیر شاکر دې وروستیو کې ویلي و، چې پاکستاني امنیتي ادارو ورته ویلي چې ژوند یې له ګواښ سره مخ دی او د خپل ځان د ساتلو لپاره تدابیر ونیسي.
نوموړي د پاکستان پر امنیتي ادارو هم نیوکې کړې وې چې د ده د امنیت په برخه مرسته نه کوي.
تر اوسه پورې کومې وسلې ډلې د برید په غاړه نه دی اخیستی.
