د پښتونخوا صوبايي اسمبلۍ او د عوامي نشنل ګوند غړی وايي، پاکستان د پلان له مخې له افغانستان سره ۱۷ لارې بندې کړې، خو د دغو لارو بندښت پښتنو ته لوی زیان رسوي. نثار باز زیاتوي، پاکستان په دې کار سره غواړي افغانستان په سیمه کې یوازې کړي او پر طالبانو سیاسي فشار واچوي.
له نږدې ۲۲ ورځو راهیسې د طالبانو له خوا د پوستې جوړولو پر سر د تورخم لار بنده ده او د خلاصولو لپاره یې د دواړو لورو د قومي مشرانو او سوداګرو جرګه هم جوړه شوې ده.
ښاغلی باز له پښتون ډیجیټل پوډکاسټ سره خبرو کې وايي، چې په اصل کې له افغانستان سره له چترال تر چمن ۱۷ لارې بندې کړې دي.
هغه زیاتوي، د پاکستان د دې پلان په مقابل کې افغانستان د ایران د چابهار بندر ته مخه کړې ده: «افغانستان پلان لري چې خپله سوداګرې د چابهار بندر له لارې دوام ورکړي، خو په دې صورت کې به زیان د پاکستان عامو خلکو او سوداګرو ته ورسیږي.»
خو ښاغلی باز وايي، که دې جرګې خپلواکې لرلای د پاکستان او افغانستان ترمنځ ټکرونه به پای ته رسیدلي وای او لاره به د سوداګرۍ پر مخ خلاصه شوې وای.« دا جرګه به هغه وخت بریالۍ شوې وای، چې ریاست ورته بشپړ واک او اختیار ورکړی وای. او پکار و، چې د صوبايي حکومت ترڅنګ مرکزي حکومت هم پکې دخیل وای. »
نوموړی د افغانستان او پاکستان ترمنځ د سوداګریزو لارو خلاصون اړین بولي او وایي، د لارو په بند پاتې کېدو سره به د کرښې دواړو غاړو خلک ډیر زیانمن شي.
