د ناروې د کډوالو شورا خبر ورکړی، چې د افغانستان په ځینو ولایتونو کې یې د بودجې د کمښت له امله خپل فعالیتونه درولي دي. د دغې شورا د راپور له مخې، د مرستو کمښت به تر ډېره افغانې ښځې او ماشومان تر نورو ډېر اغېزمن کړي.
دغې شورا په خپل تازه راپور کې خبرداری ورکړی، چې د مرستو پراخ کمښت به په افغانستان کې د بشري ادارو د کمېدو لامل شي او ورسره به د مېلیونونه خلکو ژوند له ګواښ سره مخ شي.په افغانستان کې د ناروې د کډوالو شورا مشرې سوزي وان میګن ویلي: «په داسې وخت کې چې په افغانستان کې نارینه، ښځې او ماشومان په بېړنۍ توګه نړۍوالو مرستو او ملاتړ ته اړتیا لري؛ خو زموږ شریکان د مهمو مرستندویانو لهخوا د تمویل له سخت کمښت سره مخ دي.»د هغې په وینا، د ډېری بشري سازمانونو په څېر په افغانستان کې د ناروې د کډوالو شورا اړه شوې چې په څو ولایتونو کې خپل دفترونه وتړي او ډېری کارکوونکي له دندو ګوښه کړي.په راپور کې راغلي، چې د روان زېږدیز کال په جنورۍ میاشت کې متحده ایالاتو خپلې مرستې وځنډولې چې د امریکا لهخوا تمویل شوي ډېری بشري کارونه ورسره وځنډېدل او یا هم پای ته ورسېدل.د اغلې وان میګن په وینا، دوی په افغانستان کې خپل ټول فعالیتونه نه بندوي؛ بلکې ځیني فعالیتونه یې درولي دي.هغې زیاته کړې: «موږ ژمن یو، چې په افغانستان کې پاتې شو؛ ترڅو د بې ځایه شویو مېرمنو، نارینهو او ماشومانو ملاتړ وکړو او ډاډ ترلاسه کړو، چې د لسیزو جګړو څخه اغېزمنې شوې ټولنې شاته پاتې نه شي.»راپور وړاندې کاږي، چې د روان زېږدیز کال له جنورۍ میاشتې راهیسې دغه شورا اړه شوې چې خپل دوه مرکزونه د بودجې د کمښت له امله وتړي.راپور زیاتوي، چې دغه مرکزونه د راستنېدونکو او داخلي بېځایه شویو افغانانو په ملاتړ کې خورا مهم رول لوباوه.
