د ایران د تایباد والي وايي، چې په شمال ختيز کې يې له افغانستان سره د ۵۵ کیلومتره سرحدي دیوال د جوړولو لومړی پړاو په بریالیتوب پای ته رسولی. حسین جمشيدي زياتوي، چې د شمال ختیزو پولو د تړلو پلان ۹۵۳ کیلومتره دی، چې په لومړي ګام کې به تر ۳۰۰ کیلومتره زيات په رضوي خراسان کې پلی شي.
د تایباد والي حسین جمشيدي له ایرنا خبري اژانس سره په مرکه کې ویلي، چې په ختيزو پولو کې ددغه پلان د پلیتابه لپاره د ۱۰۰ کیلومترو په اندازه زېربیناوې چمتو شوې دي.
د نوموړي په خبره، پر پوله دغه زېربیناوې به د انجينرانو د مهالوېش له مخې په ټاکل شویو ځایونو کې کېښودل شي.
د تایباد د والي د معلوماتو له مخي، د جوړ شوي ديوال لوړ والی ۴ متره دی او پر پورتنۍ برخه یې کټارې هم جوړيږي.
حسین جمشيدي زياته کړه، چې د ایران او افغانستان د پولو بندول او دیوال جوړول د دوی تر ټولو مهم او ستراتیژيک پلان دی.
نوموړي زياته کړې، چې پر پوله د دیوال په جوړولو سره له افغانستان څخه ایران ته د غیر قانوني کډوالو په داخليدو کې د پام وړ کموالی راغلی دی.
د ایران تایباد ښار له افغانستان سره ۹۰ کیلومتره پوله لري او په دې پوله کې د دوغارون لار ځانګړی اقتصادي اهمیت لري.
