د اې سي سي کارت لرونکو افغانانو لپاره د دغه هېواد پرېښودو ته د ورکړل شوې مودې نن وروستۍ ورځ ده؛ له دې سره هممهاله په راولپنډۍ کې د پولیسو مشر د بې اسناده افغان کډوالو د نیولو امر وکړ.
ډان ورځپاڼې د خپلو سرچینو په حوالې راپور ورکړی، چې د راولپنډۍ د پولیسو مشر لارښوونه کړې چې په دغه ښار کې د بې اسناده مېشتو افغان کډوالو پر وړاندې قانوني اقدام وکړي.
پولیسو ته لارښوونه شوې، چې هر هغه افغانان چې په جرمي فعالیتونو کې ښکېل وي؛ ونیسي او له کورنۍ سره یې یوځای له دغه ښاره وباسي.
د پولیسو یوه چارواکي د یکشنبې په ورځ ډان ته وویل:« موږ ته لارښوونه شوې، چې ټول هغه افغان کډوال چې د اې سي سي کارتونه لري باید له راولپنډۍ او اسلام اباد څخه واېستل شي.»
سربیره پردې په لارښوونو کې راغلي، هغه افغانان چې د (PoR) کارتونه لري او په اسلام اباد او راولپنډۍ ښارونو کې ژوند کوي؛ باید خبرداری ورکړل شي چې دوی او د دوی کورنۍ باید د حکومت د پالیسۍ سره سم له پاکستانه ووځي.
د PoR کارت لرونکو لپاره د پاکستان پرېښودو وروستۍ نېټه (د جون ۳۰مه) ښودل شوې ده.
په پاکستان کې د ملګرو ملتونو د کډوالو ادارې استازې فیلیپا کېنډلر وایي، چې پاکستان او افغانستان باید په ګډه کار وکړي؛ ترڅو ډاډ ترلاسه شي چې افغان کډوال په خپله خوښه او خوندي ډول بېرته خپل هېواد ته ستنېږي.
هغې اشاره وکړه، د هغو افغانانو لپاره چې د اوس لپاره په خوندي ډول بېرته نشي ستنېدای؛ په پاکستان کې باید هڅه وشي، چې دوی ته د زدهکړو، روغتیایي پاملرنې او کاري فرصتونو برابره شي.
د هغې په وینا، پاکستان د ۱.۵۲ مېلیون راجستر شويو افغان کډوالو او پناه غوښتونکو کوربهتوب کوي؛ اټکل کېږي چې ۸۰۰،۰۰۰ د اې سي سي کارت لرونکي افغانان هم په دغه هېواد کې مېشت دي.
هغې وويل:« د افغان کډوالو لپاره د پاکستان دوامداره ملاتړ د ستاینې وړ دی؛ خو بې له شکه د کوربه هېواد لپاره یوه ننګونه ده.»
مېرمن کینډلر زیاته کړه، چې پاکستان په یوه سخته مرحله کې بند پاتې دی.
