د فرانسې د خبري اژانس د راپور له مخې، نړیوال بانک د جمعې په ورځ په یوې اعلامیه کې ویلي، چې سعودي عربستان او قطر د سوریې پاتې پورونه، چې شاوخوا ۱۵.۵ میلیون ډالر وو، ادا کړي دي.
دا اقدام به نړیوال بانک ته زمینه برابره کړي، څو له اوږدې وقفې وروسته په سوریه کې خپل پراختیایي فعالیتونه بېرته پیل کړي.
نړیوال بانک په خپله اعلامیه کې ویلي: «له څو کلونو جګړو وروسته، سوریه د بیا رغونې او پراختیا په لور روانه ده.» د دې بانک لومړنۍ پروژه به د نوي سوریایي حکومت سره په همکارۍ، پر دې تمرکز وکړي چې څنګه خلکو ته اسانه برېښنایي خدمات برابر کړي.
د اوکراین ولسمشر ولادیمیر زېلېنسکي وايي، چمتو دی، چې د سولې د ټینګښت لپاره ژر او عملي ګامونه واخلي، خو ټینګار کوي که روسیه پر یو بشپړ او بې قید و شرط اوربند موافقه ونه کړي، نو نړیواله ټولنه باید پر مسکو خپل فشارونه لا زیات کړي.
زېلېنسکي د اروپايي ټولنې د سرمشریزې په ترڅ کې د خپلو خبرو پرمهال وویل، چمتو و چې د روسیې له ولسمشر ولادیمیر پوتین سره په ترکیه کې مخامخ د سولې خبرو ته کښېني، خو پوتین د سولې په خبرو کې له ګډون څخه ډډه وکړه.
د اوکراین ولسمشر ولادیمیر زېلېنسکي د روسیې د مرکچي پلاوي د صلاحیتونو په اړه نیوکه کړې او ویلي یې دي چې استانبول ته د دغه پلاوي استول، چې بشپړ صلاحیت نه لري، دا ښيي چې مسکو د سولې لپاره ریښتینې اراده نه لري.
هغه وویل: "استانبول ته د روسیې د بېصلاحیته استازي لیږلو، دا ثابته کړه چې دوی د سولې لپاره جدي نه دي. دا خبرې د دواړو هېوادونو لپاره یو غوره فرصت وو، خو روسیې یو ځل بیا دا موقع له لاسه ورکړه."
زېلېنسکي زیاته کړه: "روسیې ترکیې ته هغسې یو بېصلاحیته پلاوی واستاوه، لکه څنګه چې یې په ۲۰۲۲ کال کې هم خبرې اترې کړې وې او دا ښيي چې د دوی په دریځ کې هیڅ بدلون نه دی راغلی."
پر همدې مهال د اوکراین ولسمشر ولادیمیر زېلېنسکي ویلي، چې د فرانسې له ولسمشر، د جرمني، برېتانیا او پولنډ له لومړي وزیرانو سره یې په ګډه د امریکا له ولسمشر ډونالډ ټرمپ سره د ټیلیفون پر لیکه د استانبول د ناستې په اړه خبرې کړې دي.
زېلېنسکي یو ځل بیا د جګړې د پای ته رسولو لپاره د بې قید و شرط اوربند غوښتنه وکړه او ټینګار یې وکړ، که روسیه له سولې او اوربند کولو څخه پر شا شي، نو نړیواله ټولنه باید پر مسکو سخت بندیزونه ولګوي.
د ملګرو ملتونو د پراختیایي پروګرام (یو این ډي پي) په یوه تازه راپور کې ویل شوي، چې د تېر میلادي کال تر پایه پورې، په ټوله نړۍ کې شاوخوا «۸۳.۴میلیونه کسان» د جګړو، زورزیاتي او طبیعي پېښو له امله په خپلو هېوادونو کې له خپلو مېنو بې ځایه شوي دي.
راپور کې راغلي چې کانګو، سوډان، لبنان، اوکراین او افغانستان د هغو هېوادونو په ډله کې دي چې د داخلي بې ځایه شویو شمېر پکې تر بل هر ځایه ډېر دی.
په افغانستان کې یوازې د تېر میلادي کال په اوږدو کې شاوخوا « ۱.۳ میلیونه کسان» چې ډېری یې د طبیعي پیښو له امله وو، له خپلو مېنو بې ځایه شوي دي.
ملګري ملتونه زیاتوي، چې د نړۍ له ټولو ۸۳ میلیونو نه ډېر کورني بې ځایه شویو کسانو څخه شاوخوا « ۷۳.۵ میلیونه» یې د جګړو او تاوتریخوالي له کبله او « ۹.۸ میلیونه» نور بیا د طبیعي افتونو له امله بې ځایه شوي دي.
د ملګرو ملتونو د شمیرو پر بنسټ، د کور دننه بې ځایه شویو کسانو شمېر د تېر کال په پرتله ۱۰ سلنه زیاتوالی ښيي.
د پاکستان ډان ورځپاڼې د خپلو سرچینو په حواله راپور ورکړی، چې سعودي عربستان په تېرو ۱۶ میاشتو کې په ټولیز ډول ۵۰۳۳ پاکستاني سوالګر شړلي دي. راپور وړاندې وايي، ورته مهال په پنځو نورو هیوادونو کې ۳۶۹ نور کسان د سوال کولو په تور نیول شوي دي.
ډان په خپل راپور کې وړاندې وايي، چې دغه معلومات د پاکستان د کورنیو چارو وزیر محسن نقوي د چهارشنبې په ورځ د پاکستان د پیپلز ګوند د غړې سحر کامران د پوښتنې په لیکلي ځواب کې ملي شورا ته وړاندې کړل.
د محسن نقوي لهخوا ورکړل شوي رسمي معلومات ښیي، چې د ۲۰۲۴ کال له جنورۍ راهیسې ټولټال ۵۴۰۲ پاکستانیان له سعودي عربستان، عراق، مالیزیا، عمان، قطر او متحده عربي اماراتوڅخه پاکستان ته راشړل شوي.
د معلوماتو له مخې په ۲۰۲۴ کال کې شاوخوا ۴۸۵۰ پاکستاني وګړي له دغو هیوادونو څخه د شړلو له ګواښ سره مخ شوي او په ۲۰۲۵ کې ۵۵۲ یې پاکستان ته شړل شوي دي.
راپور زیاتوي، چې د پیپلز ګوند غړي د تیرو درېیو کلونو معلومات غوښتل، خو وزیر یوازې د ۲۰۲۴ کال له جنوري وروسته جزیات وړاندې کړل.
د ډان ورځپاڼې راپور کاږي، چې د پاکستان د صوبو په کچه د معلوماتو جلا کول ښيي، چې له دغو هېوادونو څخه ایستل شوي ډېری کسان د سند ایالت دي.
وايي، د دې صوبې ټولټال ۲۷۹۵ کسان د سوال کولو په تور له دغو هېوادونو په ایستل شويو کسانو کې شامل دي، خو وای د پنجاب د ایستل شویو سوالګرو شمېر بیا ۱۴۳۷ دی.
د امریکا متحدهایالاتونو ستره محکمه د ناقانونه او موقتي کډوالو د نویو زېږېدلو ماشومانو لپاره د امریکا ولسمشر ډونالډ ټرمپ د تابیعت حق بندیز فرمان ارزوي. دغه بندیز د ناقانونه او موقتي کډوالو نویو زېږېدلو ماشومانو د تابعیتاخیستو مخنیوی کوي.
د اسوشیټېډپرېس د راپور لهمخې، قاضیانو د پنجشنبې ورځ په یوې غونډه کې ټینګار کړی چې هڅه کوي د ټرمپ د دغه فرمان د پلي کېدو مخنیوی وکړي، خو ورته مهال ښايي د محکمو صلاحیتونه د ټول هېواد په کچه د حکمونو د صادرولو په برخه کې محدود کړي.
د امریکا اساسي قانون، د ۱۸۹۸ میلادي کال د سترې محکمې د پرېکړې پر بنسټ، ټولو هغو ماشومانو ته چې د دغه هېواد په خاوره کې نړۍ ته راځي، د تابعیت اجازه ورکوي. همدې پرېکړې تر اوسه د ټرمپ فرمان د پليکېدو مخه نیولې ده.
د ډونالډ ټرمپ نوی فرمان د هغه د دویمې دورې ولسمشرۍ دورې هغو پراخو هڅو یوه برخه بلل کېږي چې غواړي د امریکا د کډوالۍ په سیاست کې بدلون راولي. همداراز، هغه حکومت د لاتینې امریکا هېوادونو د سلګونو زرو کډوالو لپاره د لنډمهالې استوګنې پروګرامونو د پای ته رسېدو غوښتنه کړې ده.
د یادونې ده چې د امریکا متحدهایالاتونو سترې محکمې لا تر اوسه پورې خپله وروستۍ پرېکړه نه ده اعلان کړې.
د امریکا ولسمشر ډونالډ ټرمپ وايي چې د فارس خلیج شتمن عربي هېوادونه غواړي په متحدهایالاتونو کې ۱۰ ټریلیون ډالر پانګونه وکړي.
د اناډولو خبري اژانس د راپور پر بنسټ، نوموړي دا څرګندونې د پنجشنبې ورځ د قطر په العُدید هوايي اډه کې د وینا پرمهال کړې دي. د ټرمپ په وینا، قطر له امریکا نه د ۴۲ مېلیارد ډالرو په ارزښت پوځي تجهیزات اخلي او همداراز ۱۰ مېلیارد ډالر پر العُدید هوايي اډې پانګونه کوي.
دا لا څرګنده نه ده چې له سعودي عربستان، قطر او متحده عربي اماراتو پرته نورو کومو عربي هېوادونو د امریکا له ولسمشر سره د پانګونې ژمنه کړې ده؛خو د امریکا د رسمي اعلانونو لهمخې، سعودي عربستان، متحده عربي امارات او قطر به په راتلونکو څو کلونو کې په متحدهایالاتونو کې نږدې ۴ ټریلیون ډالر پانګونه وکړي.
ټرمپ همداراز زیاته کړې چې د امریکا پوځ به ډېر ژر تر بل هر وخت لوی، پیاوړی او پرمختللی شي. د هغه په خبره، د امریکا هوايي ځواک به ډېر ژر د نړۍ د شپږم نسل لومړنۍ جنګي الوتکې یعنې ایف-۴۷ ترلاسه کړي.
د امریکا ولسمشر وايي چې هغه د توغندیزو بریدونو پر وړاندې د متحدهایالاتو د دفاع لپاره د «طلایي ګنبد» په نوم د دفاعي سېسټم د جوړېدو امر هم کړی دی.
ورته مهال، نوموړي زیاته کړې چې که دی ولسمشر وای، روسیې به پر اوکراین برید نه کاوه او همداراز اکتوبر د ۷مې پر اسراییل برید به هم نه و رامنځته شوی.
هغه یو وار بیا له افغانستانه امریکايي ځواکونو وتل «وحشتناک او شرموونکی» بللی او وايي چې د بایډن ادارې باید د بګرام هوايي اډه نه وای پرېښې.
د امریکا ولسمشر د وینا په پای کې ویلي چې د خپلې ولسمشرۍ دورې پرمهال یې د پاکستان او هند ترمنځ اوربند ټینګ کړی او له دواړو هېوادونو سره یې د جګړې پر ځای د سوداګرۍ په هکله خبرې کړې دي. د هغه په وینا، اسلاماباد او نوی ډیلي له دې پرېکړې خوښ دي.