د طالبانو د ریاست الوزرا اداري مرستال عبدالسلام حنفي وایي، چې طالبان په افغانستان کې د هر ډول بهرنۍ پانګونې ملاتړ کوي. نوموړي دغه خبرې په کابل کې د چین له سفیر ژاو شېنګ سره په کتنه کې وکړې او زیاته یې کړه، چې اوسمهال په افغانستان کې پانګونې ته ښې زمینې برابرې دي.
د طالبانو تر واک لاندې ارګ د یکشنې په ورځ د یوې خبرپاڼې په خپرولو سره ویلي، چې د چین سفیر په دې کتنه کې له افغانستان سره په بېلابېلو برخو کې د دغه هېواد د همکاریو د دوام پر ژمنې یو ځل بیا ټینګار وکړ.نوموړي همداراز په افغانستان کې د چیني سوداګرو او شرکتونو له لوري د پانګونې په برخه کې لېوالتیا ته اشاره وکړه او ویې ویل، چې د چیني سوداګرو او پانګهوالو له خوا د پانګونې په صورت کې به د افغانستان خلکو ته ډېر کاري فرصتونه برابر شي.دواړه خواوې په داسې حال کې د چین او افغانستان ترمنځ د اړیکو پر پیاوړتیا ټینګار کوي، چې ټاکل شوې چین روانه اوونۍ د افغانستان او پاکستان په ګډون د یوې درې اړخیزې ډیپلوماتیکې ناستې کوربهتوب وکړي.د راپورونو له مخې، په دې ناسته کې به د طالبانو د بهرنیو چارو وزیر، د پاکستان او چین د بهرنیو چارو وزیران پکې برخه واخلي.سره له دې چې پر افغانستان د طالبانو له واکمنېدو وروسته بېجینګ هڅه کوي چې له طالبانو سره اړیکې وساتي، خو له کابل څخه بیا غواړي ډاډ ورکړي چې د افغانستان خاوره د چین ضد وسلهوالو ډلو په ګټه نهکارول کېږي.
