په پاکستان کې د کم عمره نجونو او هلکانو په ودونو بندیز ولګېد

د پاکستان د سنا مجلس د پیپلز پارټۍ د غړې شیري رحمان له لوري وړاندیز شوی د کم عمره نجونو او هلکانو د ودونو د بندیز قانون منظور کړ. دغه قانون کې راغلي، چې د ۱۸ کلونو کم عمره هلک یا نجلۍ به ماشومان ګڼل کېږي او نکاح به یې نه تړل کېږي.

د دغه قانون له مخې، نکاح‌ تړونکی به د دواړو خواوو د پېژندپاڼو له لارې د عمر تصدیق کوي او د دې قانون سرغړوونکي به تر یو کال بند او یو لک روپۍ جریمې سره مخ کېږي.

دا په داسې حال کې ده، چې د جمعیت علماء اسلام سناتور کامران مرتضیٰ د دغه قانون مخالفت وکړ او ویې ویل، چې دا مسوده دې اسلامي نظریاتي شورا ته واستول شي.

همدا ډول مولانا عطاالرحمان وویل، چې دا قانون د والدینو حق تر پښو لاندې کوي او که ماشوم ته له والدینو پرته ازادي ورکړل شي، ټولنه به د اروپا په شان شي.

په دغه قانون کې راغلي: « که یو بالغ سړی له کم عمرې نجلۍ سره واده وکړي، نو هغه ته به تر درې کاله بند سزا ورکول کېږي. له ۱۸ کلونو کم عمره ماشوم یا ماشومې سره جنسي اړیکه به د جنسي تېري په توګه ګڼل کېږي. هغه څوک چې یو ماشوم د واده لپاره مجبوروي، تر اووه کاله بند او لس لکه روپۍ جریمه به پرې لګېږي».

د پاکستاني رسنیو د راپورونو له مخې، په دې قانون کې ویل شوي چې که څوک د ماشوم د واده لپاره قاچاق کوي یا مرسته کوي، هغه ته هم تر اوو یا درېیو کلونو بند او جریمه سزا ورکول کېږي.

همدا ډول که مور، پلار یا سرپرست ماشوم ته واده وکړي یا یې مخه ونه نیسي، هغوی ته هم تر درې کاله بند او د نغدي جریمې سزا ټاکل شوې.

قانون کې راغلي: «محکمه به حق لري چې د کم عمره ماشوم د واده د مخنیوي لپاره حکم صادر کړي او که اطلاع ورکوونکی خپل نوم پټ ساتل غواړي، عدالت به یې خوندیتوب کوي. دا جرم ناقابل ضمانت ګڼل شوی او د قضايي پروسې د ۹۰ ورځو دننه به پرېکړه کېږي.»