طالبانو وایي، د کابل او ځینو ولایتونو په پوهنتونونو کې شاوخوا سل ملي او نړۍوال ژورنالونه جوړ شوي. د طالبانو تر واک لاندې ملي راډيو ټلویزیون د پوهنې وزارت له قوله راپور ورکړی، تراوسه په دولتي پوهنتونونو کې ۵۲ ملي او په خصوصي پوهنتونونو کې ۲۴ ملي او ۱۱ نړۍوال ژورنالونه جوړ شوي.
په راپور کې راغلي، چې له دې ژورنالونو څخه بیا د هېواد په دننه د علمي څېړنو، مقالو خپراوي او علمي تبادلې لپاره ګټه اخیستل کېږي.
د راپور له مخې، تر دې وړاندې افغان استادانو او څېړونکو به په ډېرو ستونزو او لوړ لګښت خپلې علمي څېړنیزې مقالې په نړۍوالو ژورنالونو کې خپرولې.
د یاد وزارت د مسوولینو له قوله په راپور کې همداراز زیاته شوې، چې یاد شمېر ژورنالونه په کابل پوهنتون، پولي تخنیک پوهنتون، ننګرهار پوهنتون، د کابل د طبي علومو پوهنتون او په جوزجان پوهنتون کې د نړۍوالو اصولو او معیارونو پر بنسټ جوړ شوي.
طالبانو ویلي، چې په دغو ژورنالونو کې د کور دننه لیکوالانو ترڅنګ، نړۍوالو لیکوالانو ته هم پکې د مقالو نشرولو زمینه برابره شوې ده..
دا په داسې حال کې ده، چې طالبانو په دې وروستیو کې د هېواد په بېلابېلو ولایتونو کې په پراخه کچه له پوهنتون څخه د استادانو ګوښه کول پیل کړي دي او تراوسه یې لسګونه تجربه لرونکي استادان له دندو ګوښه کړي دي.
طالبان هڅه کوي، چې د پوهنتون استادان د اړتیاوو په پام کې نیولو پرته د دوی په خوښه فعالیتونه وکړي او یوازې د دې ډلې ګټې په پام کې ونیسي.
د طالبانو د دغو بندیزونو له امله ډېر شمېر استادان استعفا کولو ته اړ شوي او له هېواد څخه وتلي دي.
طالبانو په تېرو څو ورځو کې د کابل ننګرهار، خوست، پکتیا، بدخشان او بامیان له پوهنتونونو نه سلګونه استادان او اداري کارکوونکي د «تنقیص» په نوم له دندو ګوښه کړي دي.
پر افغانستان د طالبانو له واکمنېدو وروسته په علمي او تخصصي مرکزونو کې د اکاډمیکو کسانو ګوښهکېدل په سېستماتیک شکل روان دی او یاده ډله هڅه کوي، چې په دې ځایونو کې له خپلې ایډيالوژۍ سره جوړ او د مدرسو ملایان وګوماري.
د طالبانو لهخوا پر مدرسې د پوهنتون د بدلېدو روان بهیر د افغان اکاډمیکو شخصیتونو، محصلانو او استادانو ترمنځ پراخې اندېښنې راپاورلي دي.
په افغانستان کې د پوهنتونونو د متخصصو او تجربهلرونکو استادانو د ګوښهکېدو بهیر داسې مهال روان دی، چې هېواد تر بل هر وخت ډېر علمي او مسلکي پرمختګ ته اړتیا لري.
