طالبانو له ټایلنډ نه غوښتي، چې په افغانستان کې خپلې ځنډول شوې چاپیریالي پروژې بیا پیل کړي
د طالبانو د چاپېریال ساتنې ادارې مشر مولوي مطیعالحق خالص په روسیه کې د ټایلنډ د پارلمان له یو شمېر غړو او سناتورانو سره کتلي او په افغانستان کې یې د دغه هېواد لهخوا د تمویل کېدونکو ځنډول شویو چاپیریالي پروژو د بیا پیل غوښتنه کړې.
د طالبانو چاپيریال ساتنې ادارې د یوې خبرپاڼې په خپرولو سره ویلي، چې دواړو لوریو پر ګډو همکاریو، د اقلیمي بدلون، سیمه ییزو او نړیوالو ناستو او په افغانستان کې د ځنډول شویو چاپېریالي پروژو پر وضعیت خبرې کړې.
په خبرپاڼه کې راغلي: «په دې کتنه کې ټایلنډي سناتورانو وویل، چې هېواد یې د سیمې په کچه د چاپېریالي ستونزو د حل ترڅنګ له اقلیمي بدلون سره د مبارزې برخه کې له افغانستان سره همکارۍ ته چمتو دی.»