د پاکستان د بهرنیو چارو وزارت د هند لومړي وزیر نرېندرا مودي وروستیو څرګندونو ته غبرګون ښودلی او هغه یې پاروونکې بللې دي. دغه وزارت په یوه خبرپاڼه کې د مودي داسې څرګندونې د ملګرو ملتونو له منشور څخه ښکاره سرغړونه بللې ده.
نریندرا مودي د هند په ګجرات کې د یوې غونډې پرمهال ویلي و، چې سوله یو انتخاب دی؛ خو که ترهګري دوام ومومي نو غچ اخیستل حتمي خبره ده.
هغه د پاکستان خلکو ته ویلي:«په سوله کې ژوند وکړئ او خپله یوه ګوله ډوډۍ هوسا فضا کې وخورئ؛ که نه زما ګولۍ تل چمتو دي.»
خو د پاکستان د بهرنیو چارو وزارت په خپرې کړې خبرپاڼه کې دغه څرګندونې له تاوتریخوالي او کرکې ډکې بللې دي.
په خبرپاڼه کې راغلي، چې پاکستان تل سولې ته ژمن دی.
