سیمهییزو سرچینو افغانستان انټرنشنل ته ویلي، چې طالبانو په دایکنډي ولایت کې د لاسي فوټبال لوبه منعه کړې ده. د سرچینو په وینا؛ طالبانو ویلي چې د دغه مېز پر سر پلاستیکي لوبغاړي یا سړي «بتانو ته ورته دي او په اسلام کې له بتانو سره لوبې کول حرام دي.»
سرچینو د چهارشنبې په ورځ (د غبرګولي ۷مه) ویلي، طالبانو ورزشي کلپونو ته امر کړی، چې «که چېرته د دغه لوبو پلاستیکي سړیو سرونه پرې کړي؛ نو کولای شي لوبه وکړي، کنه دغه لوبه منعه شوې ده.»
طالبانو لا په رسمي توګه د لاسي فوټبال د بندیز په اړه څه نه دي ويلي.
د طالبانو حکومت په نږدې څلورو کلونو کې په افغانستان کې په تدریجي توګه ځینې لوبې منعه او محدودې کړې دي.
د طالبانو ورزش ادارې تېره میاشت هم په افغانستان کې د شطرنج فدراسیون فعالیتونه وځنډول او دغه لوبه یې «حرام» اعلان کړه.