د اوکراین په بریدونو کې د ۷ مېلیارد ډالرو په ارزښت ۴۱ روسي بمغورځوونکې الوتکې ویجاړې شوي
اوکراین د بېپیلوټه الوتکو په برید کې د روسیې پر څلورو اټومي پوځي اډو حمله وکړه، چې په پایله کې یې د ۷ مېلیارده ډالرو په ارزښت ۴۱ روسي بمغورځوونکې الوتکې ویجاړې کړې دي.
دا بریدونه د روسیې پر ضد د جګړې له پیل راهیسې تر ټولو ستر او تر ټولو لرې واټن لرونکي عملیات ګڼل کېږي.
راپورونه وایي، چې اوکراین د یکشنبې په ورځ (د غبرګولي ۱۱مه) د خپلو بې پيلوټه الوتکو له بریدونو مخکې امریکا ته د خپلو پلانونو خبر نه و ورکړی.
د اوکراین ولسمشر ولادیمیر زېلېنسکي تر دې برید وروسته په ټېلګرام کې ولیکل، چې دا یوه «بشپړه خپلواکه هڅه» وه.
زېلېنسکي زیاته کړې، چې دا عملیات له یو نیم کال راهیسې پلان شوي و.
اکسیوس خبري اژانس د اوکرایني چارواکو په حواله ویلي، چې کییف د ډونالډ ټرمپ د ادارې سره هېڅ همغږي یا مخکې اطلاع نه ده شریکه کړې.
د اوکراین د امنیتي ادارې مشرانو د روسیې څلورو پوځي اډو د بریدونو مسوولیت منلی او ویلي یې دي، چې په ټوله کې ۴۱ روسي الوتکې په نښه شوي دي.
د دې ادارې په وینا، د له منځه وړل شویو طیارو ارزښت تر ۷ مېلیاردو ډالرو زیات دی.
زېلېنسکي دغه برید یو «په زړه پورې عملیات» وبلل او ویې ویل، چې دا تر اوسه پورې د اوکرایني ځواکونو تر ټولو لرې واټن لرونکی برید دی.
هغه زیاته کړه، چې په دې عملیاتو کې ۱۱۷ بې پيلوټه الوتکې کارول شوي او روسي ځواکونو ته یې جدي تاوانونه اړولي دي.
ټېلګراف ورځپاڼې بیا راپور ورکړی، چې دا برید په هغو څلورو پوځي اډو شوی چې په بشپړه توګه د روسیې په خاوره کې موقعیت لري او کېدای شي د اوکراین په درې کلنه جګړه کې دا تر ټولو ویجاړونکي بې پيلوټه بریدونو څخه وي.
د ټېلګراف په حواله، دا عملیات چې د «تار» نوم ورکړل شوی، تر ۱۸ میاشتو زیاته موده کې پلان شوی او د زېلېنسکي په مستقیمه څارنه ترسره شوی دی.
رویترز خبري اژانس راپور ورکړی، چې د اوکراین داخلي امنیتي اداره د نوښتګرو طریقو په کارولو سره وتوانېدله چې ستراتیژیک روسي بم غورځوونکې الوتکې په نښه کړي.
رویترز په ټولنیزو رسنیو خپرو شویو عکسونو پر اساس د یو اوکرایني امنیتي چارواکي له قوله ویلي، د چاودېدونکو توکو لرونکې بې پيلوټه الوتکې د لرګیو یوه چت کې پټې وې.
دغه چتونه د لارۍ تر شا بار شوي او نږدې د روسیې د پوځي اډو سیمو ته وړل شوي وې.
دا اهداف د ټی-یو-۹۵ او ټی-یو-۲۲ ستراتیژیک بم غورځوونکې الوتکې وې، چې روسیه ترې د اوکراین پر لور د اوږد واټن توغندیو د ګوزار لپاره کار اخلي.
د څلورو اډو څخه یوه په سایبریا سیمه کې او بله د فنلنډ سرحد ته نږدې ده.