د اسراییل پوځ: زموږ هدف د ایران د رژیم بدلول نه‌دي

د اسراییل د دفاع وزارت عمومي رییس د د دغه هېواد د فضا او هوايي صنایعو، رافیل، البیت سیسټمز او تومر کمپنیو له مشرانو څخه غوښتنه کړې چې د ایران له لوري د مزایلو د ګواښ د مخنیوي لپاره د وسلو تولید چټک کړي او د مهمو تاسیساتو د ساتنې کچه لوړه کړي.

بارام د تهران پر وړاندې د وروستیو برېدونو او د ایران د بالسټیک مزایلو د شنډولو په برخه کې د اسراییل د ټېکنالوژۍ ستاینه کړې ده او ویلي یې دي، چې دا ډول عملیات « له هغو نوښتګرو ټکنالوژیو پرته چې په تېرو کلونو کې رامنځته شوې، ناشوني وو.»

همدارنګه نوموړي وویل:«زموږ دفاع بشپړه نه ده».

نوموړي د ظرفیت لوړولو او د راتلونکو دفاعي سیسټمونو د چټک پرمختګ اړتیا مهمه بللې ده.

هغې ویلي چې حکومت د خلکو ترڅنګ ولاړ دی او د خساراتو ارزونه روانه ده، څو د جبران پروسه ژر پیل شي.

دا څرګندونې په داسې حال کې کېږي چې په تېرو ورځو کې د اسراییل د هوايي بریدونو له امله په تهران او نورو سیمو کې ګڼ ملکي ځایونه زیانمن شوي دي.

د ایران د حکومت ویاندې په ورته وخت کې ویلي:«موږ هیڅکله جګړه نه ده غوښتې. موږ خپله ټوله هڅه وکړه چې په جګړه کې ښکېل نه شو.»

فاطمه مهاجراني زیاتوي، سره له دې چې بې باوري وه، موږ خبرې اترې وکړې او غوښتل مو چې خبرې اترې پایلې ته ورسیږي.

نتنیاهو د ایران په توغندیز برېد کې له ویجاړو شویو ودانیو د لیدنې پرمهال وویل:« ایران به د ښځو، ماشومانو او نورو ملکي وګړو د قصدي وژلو ډېر دروند قیمت پرې کوي. موږ به خپلې موخې ترلاسه کوو او دوی ته به د قاطع ځواک په کارولو سره ځواب ورکړو.»

د راپورونو له مخې، پر اسراییل د ایران په برېدونو کې ۱۳ کسان وژل شوي.

نتنیاهو ویلي، چې له ایران سره د بقاء لپاره جګړه کوي.

نوموړي زیاته کړه:« فکر وکړئ که ایران اټومي وسلې درلودلای او دایې د اسراییل ښارونو پر ضد کارولې وای؟ که یې ۲۰ زره دا ډول توغندي لرلای، نو دا به زموږ لپاره یو واقعي ګواښ وای.»

ایران تازه پر اسراییل نور توغندي وار کړي، چې ځینې یې د نتنیاهو پر کور توغول شوي، خو تل ابیب وايي، شنډ کړي یې دي.

د ایران د کورنیو چارو وزارت ته نږدې میدان فاطمي، مهراباد هوايي ډګر ته څېرمه، تبریز، د میدان ولیعصر شاوخوا، د نیاوران شتمنه سیمه، د ازادۍ ورزشي لوبغالي ته نږدې سیمې، پاساژ علاءالدین سوداګریز مرکز(د خیابان جمهوری او حافظ په څلور لاره کې)، کرج ګرمدره، عظیمیه، پاستور تهران، سپیناس پلس هوټل، خمیني هوايي ډګر، شوش سیمه، میدان فردوسي، سپهبد قرني سړک، طالقاني درې لار، میدان فلسطین او همداراز صادقیه او چیتګر او د ښار مرکزي ساحې هغه ځایونه دي چې د رسنیو په وینا شاوخوا یې چاودنې یا توغندیز بریدونه پکې شوي دي.

ایراني رسنیو ویلي، چې پلازمینه تهران د څو شدیدو بریدونو هدف ګرځېدلې. همداراز شاهدانو ویډیوګانې خپرې کړې چې د چاودنو غږونه پکې اورېدل کېږي.

تر اوسه د تلفاتو یا مالي زیان کره شمېر نه‌دی اعلان شوی، خو د سیمې فضا تر شدیده امنیتي تدابیرو لاندې ده او ښاري هوايي مدافعې فعالې شوي دي.

ایراني چارواکو د اسراییل د بریدونو پړه پر امریکا اچولې او ویلي یې دي چې دوی د اوس لپاره له واشنګټن سره د خبرو اترو د دوام پلان نه لري.

ټاکل شوې وه، چې نن ورځ د خبرو اترو نوی پړاو ترسره شي.

جرمني وویل چې دوی چمتو دي چې د بریتانیا او فرانسې په ملتیا د سیمې د تاوتریخوالي د کمولو په هدف د ایران اسلامي جمهوریت سره د اټومي پروګرام په اړه بیړنۍ خبرې اترې وکړي.