د طالبانو تر واک لاندې د افغاني سرې میاشتې سرپرست شهابالدین دلاور د نړۍوال فډراسیون له مشرانو سره د راستنېدونکو کډوالو لپاره د بېړنیو او دوامدارو مرستو د جذب په موخه وکتل.
نوموړي د ملي ټولنو د نړۍوال فډراسیون د اسیا پاسېفېک حوزې له مشر الکساندر متيو او په افغانستان کې د دغه نړۍوال فډراسیون له مسوول سامي الفخوري سره په کتنه کې راستنېدونکو کډوالو ته د بېړنیو او اوږدمهاله مرستو غوښتنه وکړه.
د افغاني سرې میاشتې ټولنې سرپرست یاد پلاوي ته له ګاونډیو هېوادونو د راستنېدونکو کډوالو د يو دمي راتګ او رامنځته شوي ناورين په اړه له معلوماتو ورکړې سربېره وویل، په تورخم کې د راستنېدونکو کډوالو حالت نسبتا مخ په ښه کېدو دی او د کډوالو د راتلو لړۍ هم ورو شوې ده.
هغه دغه څرګندونې په داسې حال کې کړي دي، چې ټاکل شوې تر راتلونکو دوو ورځو له پاکستانه هم د افغان کډوالو د اېستنې بل پړاو هم پیل شي او په دې سره به د کډوالو روان ناورین تر دې هم کړکېچن شي.
د طالبانو تر واک لاندې د افغاني سرې میاشتې ټولنې د سرپرست په وینا، که چېرې د ورته خدماتو لړۍ په هرات او نیمروز ولایتونو کې هم پیل شي، کولی شي د کډوالو ستونزې تر یوې اندازې حل او راکمې کړي.
شهاب الدین دلاور زیاته کړې: «ټول هغه امکانات چې د افغاني سرې میاشتې په وس کې وي، راستنېدونکو کډوالو ته له ځنډ پرته رسول کېږي، خو ترڅنګ یې په دې بحراني حالت کې د کاري شریکانو ملاتړ او ښکېلیتا ته لازمه اړتیا ده.»
د نړۍوال فډراسیون د اسیا پاسېفېک حوزې مشر په هرات او نیمروز ولایتونو کې راستنېدونکو کډوالو ته د بېړنیو مرستو برابرول مهم وبلل.
الکساندر متيو زیاته کړه: «موږ هڅه کوو، چې له نورو کاري شریکانو سره کډوالو ته د لازمو مرستو برابرولو په موخه د همغږۍ بحثونه ولرو، څو د کډوالو ستونزې راکمې او بیرته عادي ژوند ته را وګرځي.»
د دغې کتنې په ترڅ کې دواړو لورو کډوالو ته د اوږدمهاله مرستو د برابرولو او ستونزو د راکمېدو په اړه د همکارۍ او همغږۍ کچې لوړولو ډاډ څرګند کړ.
له ایرانه د افغان کډوالو د اېستنې په پرېکړې سره په افغانستان کې د کډوالو او انساني ناورین لاپسې تشدید شوی دی.
د اسراییل او ایران تر منځ له جګړې وروسته له ایرانه د افغان کډوالو د اېستنې بهیر چټک شوی او یوازې په تېره یوه اونۍ کې څه باندې ۱۰۰ زره افغان کډوال اېستل شوي او دغه بهیر همداراز دوام لري.
د ویلو ده، چې په دې ګرمۍ کې په اسلام کلا بندر کې د را اېستل شویو افغانانو ګڼه ګوڼه ډېره ده؛ خو د اسانتیاو او په ځانګړې توګه د ټرانسپورټ او روغتیايي خدماتو د کمښت له امله را اېستل شوې کورنۍ له ګڼو ستونزو سره مخ دي.
