عبدالکریم خُرم: کابل کې د امیر شیر علي خان د مور پر تاریخي استوګنځي نقشه راغلې

د اطلاعاتو او فرهنګ پخواني وزیر او د پخواني ولسمشر حامد کرزي د دفتر رییس د طالبانو د اطلاعاتو او فرهنګ پر وزارت غږ کړی، چې د افغانستان یوه تاریخي ودانۍ له ویجاړېدو وژغوري.

عبدالکریم خُرم د یکشنبې په ورځ پر خپل اېکس لیکلي، چې د کابل دهمزنګ سیمه کې د علم او جهل څلي ته مخامخ د «امیر دوست محمد خان ښوونځی» دی چې تعمیر یې د تاریخي ابداتو په ډله کې راځي. خُرم وايي، د یو معاصر مورخ له قوله دغه ودانۍ د امیر دوست محمد خان د میرمنې او د امیرشیرعلي خان د مور بي بي حلیمې استوګنځای و چې امیر د کابل سیند پر غاړه ورته جوړ کړی و.

کریم خُرم وايي، اوس پر دې تاریخي ابدې او اوسني ښوونځي د ښاري پراختیا او سړکونو پراخولو نقشه راغلې. نوموړي هیله ښودلې، چې د طالبانو کابل ښاروالي یې تاریخي ارزښت ته په پام په ساتلو کې توجه وکړي.