د غلام خان بندر لاره د امنیتي ستونزو له امله تر نامالومې نېټې وتړل شوه
د طالبانو سیمه ییز چارواکي وايي چې په خوست کې د غلام خان بندر لار د پاکستان لهخوا تر بلې خبرتیا پورې تړل شوې ده.
په خوست کې د طالبانو ویاند مستغفر ګربز وايي، تېره شپه د غلام خان بندر د کمېسارۍ مسوولانو ته د پاکستان لهخوا خبر ورکړل شوی چې دا لار د امنیتي ستونزو له امله تر نامالومې مودې پورې بنده ده.
طالبانو له ټولو هېوادوالو، سوداګرو او مسافرو غوښتي چې تر بلې خبرتیا پورې د غلام خان له لارې د تګ راتګ نه ډډه وکړي او له بدیلو لارو ګټه واخلي.
غلام خان بندر چې د خوست ولایت له لارې د افغانستان او پاکستان ترمنځ مهمه سوداګریزه لار ګڼل کېږي، وخت ناوخت د امنیتي دلایلو له کبله تړل کېږي.