د جرمني د بهرنیو چارو وزیر یوهان واديفول ویلي، چې که څه هم د افغانانو د منلو نوي پروګرامونه بند شوي دي، خو جرمنی به هغه ژمنې چې پخوا له افغانانو سره شوې وې، بشپړې عملي کړي. نوموړی وايي، « موږ مکلف یو څو هغو ژمنو ته وفادار پاتې شو چې مخکې مو کړې دي».
دا څرګندونې وروسته له هغه دي، چې د برلین اداري محکمې په یوه پرېکړه کې د جرمني دولت مکلف وباله چې تایید شویو افغانانو ته ویزې ور کړي څو جرمني ته لاړ شي.
د ویلټ د رپوټ له مخې، واديفول د جرمني له رسنیو سره په خبرو کې وویل، « هو، د ایتلافي تړون له مخې دا پروګرام دوام نه لري، خو موږ مکلف یو چې هغو ژمنو ته وفادار پاتې شو چې مخکې مو کړې دي».
نوموړي دا هم زیاته کړه چې د محکمې پر پرېکړه به بیاکتنه کېدای شي، خو هره هغه ژمنه چې قانوني اعتبار ولري، دولت یې عملي کوي.
محکمې دا پرېکړه د یوې افغانې کورنۍ د قضیې پر بنسټ وکړه چې د ۲۰۲۳ کال په اکتوبر کې یې د جرمني له فدرالي منلو پروګرام څخه د تګ رسمي ژمنه ترلاسه کړې وه، خو لا هم د سفر اسناد نه دي ورکړل شوي.
د جرمني د فدرالي دولت له خوا پیل شوی دغه پروګرام هغو افغانانو ته ځانګړی شوی و، چې د طالبانو له اړخه له جدي ګواښ سره مخ دي.
د راپورونو له مخې، تر اوسه شاوخوا ۲۴۰۰افغانانو ته د منلو رسمي ژمنې ورکړل شوې دي.
د اتحادیې او سوسیالدیموکرات ګوندونو ایتلاف پرېکړه کړې چې دا ډول د داوطلبانه منلو پروګرامونه به "تر ډېره" بند کړي، خو محکمې ویلي، که نوې ژمنې نه ورکول کېږي، پخوانۍ ژمنې چې لغوه شوې نه وي، باید عملي شي.
