د قرغیزستان د ملي امنیت شورا وايي، چې د روسیې له خوا د طالبانو رسمیت پېژندل یو منطقي ګام دی، خو په دې معنا نه دی چې نور هېوادونه به هم زور ورته ګام واخلي، ځکه هر څوک د خپلو ګټو په رڼا کې عمل کوي.
د قرغیزستان د ملي امنیت شورا سکرتر بکتېبک بکبولوتوف د سې شنبې په ورځ تاس اژانس ته په یوه مرکه کې وویل، چې «په چولپون اتا کې د ډله ییز امنیت سازمان د امنیت شورا د سکرترانو د کمیټې په وروستۍ غونډه کې، سره له دې چې د افغانستان له خاورې د ګواښونو د له منځه وړو په برخه کې د طالبانو نړیوالې ژمنې په پام کې نیول شوې، د افغانستان د سولې او ثبات لپاره د مرستې نیتونه تایید شول».
نوموړی وايي،په دې ناسته کې د نړیوالو هڅو په چوکاټ کې د ملګرو ملتونو مرکزي همغږی رول وپیژندل شو او له نړیوالې ټولنې نه د افغانانو لپاره د بشري مرستو د زیاتولو نوې غوښتنې وشوې.
د نوموړي په وینا، په دې شرایطو کې د روسیې فدراسیون له خوا رسمیت پېژندل یو مناسب او منطقي اقدام ښکاري، خو زیاتوي، چې دا په دې معنا نه ده چې نور هېوادونه به ژر ورته ګام پورته کړي، ځکه هر هېواد به د خپلو ملي ګټو پر اساس عمل کوي.
بکبولوتوف ټینګار وکړ چې «بیشکیک د طالبانو له رسمیت پېژندنې پرته لا هم افغانستان ته بشري مرسته رسوي، په ځانګړې توګه پامیر سیمه کې مېشت قرغیز قوم ته».
تر دې وړاندې، د روسیې د بهرنیو چارو وزارت تاس خبري اژانس ته ویلي وو چې روسیې طالبان په رسميت پېژندلي دي.
تېر کال د سپټمبر په میاشت کې د قرغیزستان د بهرنیو چارو وزارت ویلي وو چې اړوندو چارواکو پرېکړه کړې چې طالبان د د ممنوعه ډلو له لېست څخه وباسي.
بکبولوتوف وايي، د امنیت او ثبات د ټینګښت، د پایښت لرونکو پرمختیایي اهدافو د ترلاسه کولو او د نېک ګاونډیتوب د اړیکو د پیاوړتیا په موخه، د ډله ییز امنیت سازمان غړي هېوادونه په هغو نړیوالو همکاریو کې راښکون ښيي، چې په مساوي ډیالوګ، د دوه ګونو معیارونو د مخنیوي، قانون حاکمیت او د هېوادونو د تاریخي او کلتوري ځانګړتیاوو په درناوي باندې ولاړې وي.
