د جمهوري نظام د بهرنیو چارو پخواني وزیر رنګین دادفر سپنتا د زمري ۲۴مه د افغانستان د تاریخ «تر ټولو توره ورځ» بللې او ویلي یې دي: «زموږ څلور کاله د څلورو پېړیو د تیارو او ورانۍ سره برابر تېر شول.» سپنتا هیله ښودلې چې تورې شپې به تېرې شي او روڼ سهار په راختلو دی.
سپنتا د جمعې په ورځ (د زمري ۲۴مه) پر اېکسپاڼې لیکلي: «څلور کاله ښایي د هېوادونو په تاریخ کې لنډ وخت وي، خو زموږ څلور کاله د څلورو پېړیو د تیارو او ورانۍ سره برابر وو.»
سپنتا پر افغانستان د طالبانو د تسلط له امله د افغانستان خلکو ته «تسلیت» ویلی.
سپنتا تر دې وړاندې د طالبانو پر وړاندې د مخالفو ډلو د یووالي غوښتنه کړې وه او د دې ډلې پر وړاندې یې پر ولسي پاڅون ټینګار کړی و.
هغه یو وخت طالبان «مصیبت» بللي وو او د طالبانو له اپوزیسیون ډلو یې غوښتي وو چې له دې مصیبت څخه د افغانستان د ژغورلو لپاره، سره یو موټۍ شي.
