پر افغانستان د طالبانو د بیا واکمنېدو د څلورمې کلیزې سره سم په هالنډ کې د نړیوالو جزايي حقوقو بنسټ فعالیت پیل کړ. دغه بنسټ د افغانستان د جګړې، تاوتریخوالي او بې عدالتۍ د قربانیانو لپاره د عدالت د ترلاسه کولو په موخه رامنځته شوی دی.
د نړیوالو جزايي حقونو بنسټ د جمعې په ورځ د هالنډ په هاګ ښار کې په رسمي ډول خپل فعالیت پیل کړی دی.
د یاد بنست د پرانیستنې سره سم د «هاګ خبرې» تر سرلیک لاندې یو ورځنۍ سمینار هم شوی، چې په کې د افغانستان ترڅنګ د نورو هېوادونو یو شمېر حقوقي او علمي شخصتیونو هم ګډون کړی و.
د یاد بنسټ غړي فرهاد رفیف وايي:« نن موږ یوازې د بشري حقونو خبره نه کوو، بلکې د هغو کسانو غږ یوو، چې ژوند یې د جګړې له امله تیت پرک شوی او غږ یې د کلونو راهیسې چوپ شوی دی.»
پر همدغه مهال د چارو شنوني ډاکټر ملک ستیز ویلي، چې په نړیواله کچه د جنایتکارانو سره سیاسي چلند کیږي او هغه کسان په افغانستان کې د عدالت د پلي کولو لپاره ټاکل شوي وو، چې پخپله په جنایتونو کې ښکېل و.
نوموړي زیاته کړه:«په نړیواله کچه ډېر کله جنایتکاران جدي نه نیول کیږي او سیاسي چلند ورسره کیږي. په افغانستان کې هم هغه کسان د عدالت د پلي کولو لپاره ټاکل شوي وو، چې پخپله په جنایتونو کې ښکېل وو او باید قانوني ځواب ویونکي واي.»
دغه بنسټ ویلي، چې بشري حقونو ته د درناوي په موخه به پر طالبانو د فشارونو راوړلو په موخه په نړیواله کچه خپل فعالیتونه پراخ کړي او د افغان ښځو او نارینه وو د حقونو د سرغړونې قضیې به په نړیوالو محکمو کې تعقیب کړي.
