په تورخم کې پاکستاني چارواکي وايی چې د اګست له لومړۍ نېټې څخه تر ۲۴ نېټې پورې د تورخم له لارې د پي او ار او اي سي سي کارت لرونکي ۶۰ زره او ۷۷۳ افغان کډوال افغانستان ته ستانه شوي دي. پاکستاني چارواکي وايي، یو ځل بیا له دغه هېواده د افغان کډوالو د ستنېدو بهیر ګړندی شوی دی.
په تورخم کې د پاکستان د کډوالو ادارې سرچینو نن دوشنبه د «وږي ۳مه» وویل چې یوازې تېر ماښام د تورخم له لارې د پي او ار کارت لرونکي ۲ زره ۴۱۹ افغان کډوال په خپله خوښه افغانستان ته ستانه شوي دي.
دوی همدراز زیاتوي، چې نن ۶ سوه او ۷۲ افغان وګړي چې هېڅ ډول اسناد یې نه درلودل، له پاکستان څخه اېستل شوي دي.
ددې شمېرو له مخې، پاکستان یو ځل بیا د افغان کډوالو د بېرته ستنولو بهیر ګړندی کړی دی.
د پاکستان د حکومت د اعلان له مخې، ټاکل شوې چې د راروانې سپټمبر میاشتې په لومړۍ نېټه د ۱،۴ مېلیونه پي او ار کارت لرونکو افغانانو د اېستلو لړۍ هم پیل شي.
په تورخم کې د انتقالاتو طالب مسوول د وږي په لومړی نېټه وویل چې وروستیو ورځو کې پاکستان یوځل بیا د افغان کډوالو د راستنولو بهیر چټک کړی او هره ورځ د پاکستان له بېلابېلو سیمو څخه سلګونه کورنۍ په زور بېرته افغانستان ته ستنیږي.
