د ایران ولسمشر مسعود پزشکیان نن دوشنبه (د وږي ۳مه) له خپل روسي سیال سر په ټلیفوني خبرو کې وویل، ایران هېڅکله هم د اټومي وسلو د جوړولو په لټه کې نه وو، نه دی او نه به وي. پزشکیان د ایران له لوري د یورانیمو د غني کولو په برخه کې د روسیې له دریځه هم ستاینه وکړه.
د ایران د ولسمشرۍ ماڼۍ د خبرپاڼې له مخې، پزشکیان په دې ټلیفوني اړیکه کې وویل: «ایران د خپلو اعتقادي او دفاعي دوکتورینو د مباني له مخې هېکله هم د اټومي وسلو د جوړولو په لټه کې نه و، نه دی او نه به وي.»
د روسیې ولسمشر ولادیمیر پوتین په دې ټلیفوني اړیکه کې د ایران له لوري د یورانیمو د غني کولو پر حق له ټينګار سربېره همداراز هیله څرګنده کړه، چې د ۲۲۳۱ پرېکړه لیک پر سر خبرې اترې هم مطلوبې پایلې ته ورسېږي.
ولادیمیر پوتین وویل، د مسکو او تهران اړیکې رغنده او د ارتقا په حال کې دي او همداراز یې د «بوشهر» اټومي بټۍ په برخه کې د دواړو هېوادونو همکارۍ د قناعت وړ وبللې او زیاته یې کړه، «دغې اټومي بټۍ ته د نورو سون توکو د لېږد بهیر روان دی.»
دا په داسې حال کې ده، چې ایران به سبا د سې شنبه په ورځ په سویس کې له جرمني، فرانسې او برېتانیا سره د ایران د اټومي پروګرام په تړاو خبرې کوي. د ایراني رسنیو د راپور له مخې؛ د دغو خبرو اجنډا د ایران اټومي تاسیسات او پر دغه هېواد د لګول شویو بندیزونو لرې کول دي.
مسعود پزشکیان زیاته کړه: «په ټينګاره سره وایم چې ګاونډیان مو وروڼه دي. په اصل کې د یوې خاورې او اوبو یو، خو اوس یو سرحد زموږ په منځ کې جوړ شوی او دا زموږ وروري نشي زیانمنولی.»
پزشکیان په ډاګه وویل، هر هغه وینا چې د مسلمانانو او ګاونډیانو وحدت او انسجام ته زیان رسوي، خیانت دی او په وینا یې نه ښايي په دې تصور چې ګواکې خدمت دی، هر چا ته هر څه وویل شي.
نوموړي زیاته کړه، «هر هغه وینا چې په کور دننه او ان د مسلمانانو او ګاونډیانو یووالی او انسجام ګډوډ کړي، خیانت له هغې لارې سره ده چې پرې روان یو.»
د پزشکیان په باور، د اسراییل او امریکا ټوله هڅه دا ده چې ایرانیان په خپل منځ کې واچوي او په سیمه کې مسلمانان د یو بل پر وړاندې ودروي او په وینا یې په کور دننه او اسلامي هېوادونو سره باید لاسونه ورکړل شي او په باور یې د تفرقې رامنځته کول اسراییل ته خدمت کول دي.
د ایران ولسمشر په ډاګه کړه، «که موږ په خپل منځ کې یووالی ولرو، له اسراییل سره د جګړې اړتیا نشته، ځکه هغوی بیا مسلمانانو ته په چپ نظر هم نشي کتلی.»
د ایران ولسمشر په داسې حال کې ګاونډي هېوادونه خپل وروڼه او خپل خپلوال ګڼي، چې له څو میاشتو راهیسې یې اړمن افغانان چې د کار روزګار، د خپلو بچیانو د زده کړو د دوام او یا هم د خپلو ځانونو او کورنیو د خوندینې لپاره ایران ته تللي، په زور سره یې راوباسي او یوازې په شاوخوا یوه میاشت کې یې څه باندې ۱ میلیون افغانان له خپل هېواده په جبر سره اېستلي او دغه بهیر همداراز په شدت سره دوام لري.