ګارډین ورځپاڼې ویلي، چې طالبانو په افغانستان کې پر هغو سینګارتونونو د بندیز تازه امر صادر کړی، چې له ۲۰۲۳ کال را وروسته په پټه فعالیت کوي. طالبانو د یادو سینګارتونونو ښځینه څښتنانو ته امر کړی چې که تر یوې میاشتې خپل کار بند نه کړي، وبه نیول شي.
طالبانو د ۲۰۲۳ کال په اګسټ میاشت کې ټول ښځینه سینګارتونونه وتړل، چې له امله یې ۱۲زره کاروبارونه بند شول او له ۵۰ زره ډیرې ښځې وزګارې شوې.
خو د طالبانو له یاد اقدام وروسته هم د افغانستان په بېلابېلو سیمو کې یو شمېر سینګارتونونو په پټه خپل فعالیت ته دوام ورکړی و.
ګارډین ورځپاڼې په خپل یوه راپور کې ویلي، چې اوس طالبانو په ټولو ولایتونو کې قومي مشرانو او سپین ږېرو ته امر کړی، چې د پټو سینګارتونونو په اړه د امر بالمعروف محستبانو سره معلومات شریک کړي.
د دریو ماشومانو مور ۳۸ کلنه فرشته وايي، چې د سینګارتونونو له تړل کېدو وروسته یې په پټه خپل کار ته دوام ورکړی، ځکه د کارکولو بله لار نه ده ورپاتې.
نوموړې وايي:« کله چې طالبانو زموږ سینګارتونونه وتړل، زه د خپلې کورنۍ یوازینۍ نفقه برابروونکې وم، خاوند مې ناروغ و، درې واړه ماشومان لرم. اړه یمه چې کار وکړم او لګښتونه یې پوره کړم».
هغه زیاتوي، «کله چې زه یو ښځه سینګار کړم، کله چې هغه ځان ته هنداره کې وګوري او موسکا وکړي، نو د هغې خوښې زما خوښي ده.»
نوموړې د طالبانو د نویو ګواښونو په اړه ویلي:« نه پوهیږم د خطر باجود به کار ته دوام ورکولی شم او که نه. دا یو ډېر لوی خطر دی. بل کار مې نه دی زده. زموږ اقتصادي حالت ډېر خراب دی، خو په دې نړۍ کې بل څوک نشته چې زموږ غږ واوري او ملاتړ مو وکړي.»
دا په داسې حال کې ده، چې د طالبانو له واکمنېدو وروسته دغې ډلې د ښځو ضد اقداماتو ته دوام ورکړی چې له امله یې میلیونونه نجونې او ښځې له زده کړو او کار کولو منع او د ښځو ټولنیز ژوند نږدې بشپړ محدود شوی دی.
