د افغانستان په ختیځ کې د کونړ، ننګرهار او لغمان ګڼې سیمې د یکشنبې ماښام ناوخته یوې زورورې زلزلې ولړزولې. د یادې زلزلې مرکز کونړ ښودل شوی او په دغه ولایت کې یې ګڼ مالي او ځاني زیانونه اړولي دي.
طالبانو اعلان کړی، چې د وروستۍ زلزلې له امله په ختیزو ولایتونو او کونړ کې د قربانیانو شمېر ۱۴۵۷ تنو او د ټپیانو شمېر ۳۳۹۴ تنو ته رسیدلی.
د زلزلې له امله د ختیزو ولایتونو په بېلابېلو سیمو کې ۶۷۸۲ کورونه ویجاړ شوي دي.
د راپورونو له مخې د کونړ نورګل، څوکۍ، چپه دره، پیچ دره، وټهپور او اسعداباد کې د نورو سیمو په پرتله ډېر زیانونه اوښتي دي.
د کونړو ځینو ولسوالیو ته د سړکونو د خرابوالي له امله د ژغورنې عملیات پڅ دوام لري.
عیني شاهدان وايي، ګڼو سیمو کې لا هم د ژغورنې عملیات دوام لري او د زلزلې قربانیان له نړېدلو کورنو راباسي.
طالبانو ویلي، چې د کونړ ګڼو سیمو ته یې د چورلکو په وسیله مرستندویه ډلې استولي او د زلزلې ګڼ ټپیان یې د ننګرهار مرکزي روغتون ته انتقال کړې دي.
ځايي خلکو او مرستندویانو د کنړ په ګڼو سیمو کې د زلزلې قربانیان په ډلهییزو قبرونو کې خښ کړل.
د کونړ د زلزله ځپلو لپاره د ملګرو ملتونو په ګډون ګڼو هېوادونو مرستې اعلان کړي دي او د ځینو هېوادونو مرستې د کونړ تر مرکزه هم رسیدلې دي.
د دووو ورځو په تېرېدو سره لا هم طالبانو د کونړ د زلزلې د زیانمن شویو کسانو لپاره د مرستو رسولو په اړه کومه ځانګړې تګلاره نه ده اعلان کړې او تر ډېره یې تکیه پر بهرنیو مرستو کړې ده.
