چین د کونړ له زلزلهځپلو سره د ۷ میلیونه ډالرو مرسته کوي
د چین د نړۍوالې پراختیايي ادارې ویاند اعلان کړی، چې دغه هېواد د افغانستان ختیځ د زلزلهځپلو لپاره ۵۰ میلیونه یوان چې د ۷.۴ میلیونه امریکايي ډالرو معادل کېږي، مرسته کوي.
د چین د نړۍوالې پراختیايي ادارې ویاند اعلان کړی، چې دغه هېواد د افغانستان ختیځ د زلزلهځپلو لپاره ۵۰ میلیونه یوان چې د ۷.۴ میلیونه امریکايي ډالرو معادل کېږي، مرسته کوي.
د چين د نړۍوالې پراختیايي ادارې ویاند لي مینګ ویلي، چې د طالبانو د حکومت په غوښتنه چین به اغېزمنو سیمو ته خیمې، کمپلې او بېړني اړین خواړه چمتو کړي.
د افغانستان ختیځ په ځانګړي ډول د کونړ ولایت وروستۍ زلزلې له ۲۲۰۵ ډېر کسان مړه کړي او له ۳ زرو ډېر یې ټپیان کړي دي.
راپورونه ښيي، چې لا هم ګڼ شمېر خلک د نړېدلو کورونو تر خاورو لاندې بند پاتې دي.
د ایران سرې میاشتې افغان زلزله ځپلو ته له ۱۰۰ ټنو زیاتې بیړنیو مرستو د لېږد خبر ورکړی. په دغو مرستو کې وچه ډوډۍ، وریژې، کمپلې او نور اړین مواد شامل دي. د دغو مرستو پنځوس ټنه برخه د هوا له لارې او ۶۰ ټنه د ځمکي له لارې لېږدول کېږي.
ایراني چارواکو ویلي، چې په یادو بیړنیو مرستو کې، خېمې، کمپلې، درمل او نور اړین توکې شامل دي.
معصومي فر ویلي:«د دغو مرستو یوه برخه به د نن ورځې ترپایه افغانستان ته داخله شي او له تهران څخه هم یوه بله برخه مرستې د هوا له لارې د زلزله ځپلو سیمو پر لور لېږل کېږي.»
پر همدغه مهال د ایران سرې میاشتې رییس بابک محمودي د پنجشنبې په ورځ د افغانستان وروستۍ زلزله ځپلو ته له ۱۰۰ ټنه زیاتو بیړنۍ مرستو د لېږد خبر ورکړی.
بابک محمودي ویلي، چې په یادو بېړنیو مرستو کې وچه ډوډۍ، وریژې، کمپلې او نور اړین مواد شامل دي. د نوموړي په وینا، د دغو مرستو پنځوس ټنه برخه د هوا له لارې او ۶۰ ټنه د ځمکي له لارې لېږدول کېږي.
په پېښور کې د طالبانو کونسل محب الله شاکر له پاکستاني چارواکو غوښتي چې د کونړ زلزلهځپلو لپاره پر کرښه ځانګړې اسانتیاوې رامنځته کړي، چې ټپیان د درملنې لپاره پاکستان ته ولېږدول شي.
نوموړي دا هم ویلي چې په لنډي کوتل کمپ کې دې افغان کډوالو ته د سکېننګ او راجسټر کولو اسانتياوې برابرې شي څو کډوال وکړای شي ټول مراحل په همدغه کمپ کې بشپړ کړي.
هغه زیاته کړې چې له دې سره به افغان کډوال په سختو موسمونو کې د تورخم له لارې په اسانۍ سره افغانستان ته ولاړ شي.
بل خوا پاکستان نن (پنجشنبه) د افغانستان د زلزله ځپلو لپاره د مرستو یوه ستره کڅوړه افغان چارواکو ته وسپارله. دا مرستې د دغه هېواد د لومړي وزیر شهباز شريف په لارښوونه لېږل شوې دي.
یادې مرستې چې په پنځو کانټینرونو کې بار وې ټولټال ۱۰۵ ټنه خوراکي او غیر خوراکي توکي پکې شامل دي.
دغه مرستې په تورخم کې د پاکستاني چارواکو له خوا محب الله شاکر ته سپارل شوې دي.
پاکستان له افغان زلزله خپلو سره خپلې ۱۰۵ ټنه بشردوستانه مرستې د افغانستان له ملي بیرغ سره واستولې، خو کله چې د مرستو موتر پر تورخم واوښتل، طالبانو د مرستو د موټرو پر بنرونو خپل سپین بیرغونه ولګول.
د افغانستان د کرېکټ ملي لوبډلې غړي محمد نبي عیسی خېل د کونړ د زلزله ځپلو لپاره په انلاین ډول ۴۱۴۱۰ انګلیسي پونډه مرسته راټوله کړې او غواړي د مرستو راټولولو بهیر تر ۵۰ زره پونډو ورسیږي.
افغان کرېکټ لوبغاړي محمد نبې درې ورځې وړاندې د محمد نبي خیریه بنسټ له لارې د کونړ زلزله ځپلو لپاره د بیړنو مرستو په موخه د انلاین نغدي مرستې راټولولو بهیر پیل کړ.
نوموړي ویلي په دې سخت حالت کې د هېوادوالو ترڅنګ ولاړ دی او پر خلکو یې غږ وکړ چې د مرستې په راټولولو کې یې همکاري وکړي.
د محمد نبي خیریه بنسټ ویلي، چې د کونړ زلزله ځپلو ته یې ځینې بېړنۍ مرستې رسولې دي او د افغانستان په ختیځ کې د زلزلې د قربانیانو لپاره یې د نورو مرستو لپاره د انلاین مرستې راټولولو هڅه پیل کړې ده.
نوموړي د ګو فنډ مي انلاین مرستو راټولولو ویبسایټ له لارې تردې مهاله ۴۱۴۱۰ انګلیسي پونډه نغدي مرسته راټوله کړې ده او غواړي د دغې مرستې کچه تر ۵۰ زره انګلیسي پونډو ورسیږي.
محمد نبي د افغانستان د کرېکټ د هغو لوبغاړو له ډلې دی، چې تردې وړاندې یې هم د هېواد په بېلابېلو ولایتونو کې له طبیعي افتونو او پېښو وروسته د خلکو لاسنیوی کړی.
د افغانستان د کرېکټ ملي لوبډلې کپتان راشد خان د کونړ زلزله ځپلو لپاره تردې مهاله ۷۶ زره او ۴۸۱ یورو نغدي مرسته راټوله کړې او غواړي دا مرسته تر ۲۵۰ زره یورو ورسیږي.
د افغانستان په ختیځ کې له مرګونې زلزلې وروسته د کرېکټ ملي لوبډلې مشر راشد خان د سې شنبې په ورځ د خپلو ټولنیزو پاڼو له لارې د مرستو راټولولو کمپاین پیل کړ او پر افغانانو او نړیوالو یې غږ وکړ چې په دغه وخت کې د زلزلې د قربانیانو ترڅنګ ودریږي.
راشد خان د ګوفنډ مي انلاین مرستو راټولولو له لارې د ۲۵۰ زره یورو راټولولو هڅه پیل کړې او وايي، راټولېدونکي پیسې به د سپټمبر په لومړۍ نېټه د ویجاړوونکې زلزلې پر قربانیانو ووېشي.
راشد خان وايي، راټولې شوې مرستې به د خان بنسټ له لارې په مستقیم ډول زلزله ځپلو کورنیو ته ورسوي او په ځانګړي ډول د ټپیانو درملنې، د بې وزلو کورنیو لپاره د خوړو، د سرپناه او د کورونو په بیارغونه کې به مصرف شي.
نوموړي د دغه کمپاین له لارې تردې مهاله ۷۶۴۸۱ یورو نغدي مرسته راټوله کړې او دغه کمپاین به تر ۲۵۰زره یورو راټولولو پورې دوام ولري.
د کرېکټ دغه وتلي ستوري وړاندې هم په هرات، فراه، بادغیس، پکتیا، پکتیکا او خوست کې له زلزله ځپلو سره د مرستو ټولولو کمپاینونه کړي او ګڼو بې کوره خلکو ته یې کورونه جوړ کړي وو.
په یادو مرستو کې تر ټولو ډېره ۵ مېلیون ډالره مرسته ملګرو ملتونواعلان کړې، خو امریکا چې په تېرو دوو لسیزو کې د افغانستان تر ټولو ستر مرستندوی و، تر اوسه خپلې مرستې نه دي ډاګیزې کړې. روسیه، چې طالبان یې په رسمیت پېژندلي، غلې پاتې شوې او چین څه کم۵۰ زره ډالره مرسته اعلان کړې.
د افغانستان په ختیز کې له زلزلې وروسته د ملګرو ملتونو په ګډون ځینو هېوادونو د بیړنیو مرستو اعلان وکړ او ځینو هېوادونو سملاسي خپلې مرستې تر کابل او کونړه رسولې دي.
د کونړ د زلزله ځپلو لپاره ملګرو ملتونو په لومړي ګام کې له خپل بیړني صندوق نه له افغانستان سره د مرستې لپاره ۵ مېلیون ډالره ځانګړي کړل.
پر همدغه مهال د ناروې د کډوالو شورا ۲ مېلیون ډالره، سوېلي کوریا او اسټرالیا یوـ یو مېلیون ډالره، برېتانیا یو مېلیون پونډه، اېرلېنډ ۵۰۰ زره ډالره، چین او سینګاپور ۵۰ ـ ۵۰ زره ډالره او اروپايي ټولنې یو مېلیون یورو او ۱۳۰ ټنه خوراکي توکو مرستې اعلان کړې.
ګڼو هېوادونو ویلي، چې یادې مرستې به د طالبانو له مداخلي پرته د مرستندویه ادارو له لارې تر اړمنو کسانو ورسوي.
پاکستان، ایران، ترکیې، قطر، هند، او متحده عربي اماراتو د کونړ د زلزله ځپلو لپاره بیړنۍ مرستې افغانستان ته رسولې دي او د یادو هېوادونو په مرستو کې خوراکي توکي، درمل، کمپلې او نور اړین توکي شامل دي.
جاپان او ځینو نورو هېوادونو هم له افغانستان سره د بیړنیو مرستو لپاره ټټر وهلی دی.
له افغانستان سره د دغه ناورین په کابو کولو کې متحده عربي امارات لومړنی بهرنی هېواد دی چې د ابوظبۍ د ملکي دفاع ادارې، ملي ګارډ او د ګډو عملیاتو د قوماندانۍ اړوند د ژغورنې او لټون ځانګړې ډله یې د افغانستان ختیزو زلزله ځپلو سیمو ته واستوله.
د کونړ د زلزله ځپلو لپاره د مرستو رسولو په برخه کې افغان سوداګرو، ورزشکارانو او عامو کسانو هم برخه اخیستې ده.
د عزیزي ګروپ مشر میرویس عزیزي د زلزله ځپلو لپاره د ۵۰۰ مېلیون افغانیو مرستې اعلان کړی او د هېواد په بېلابېلو ولایتونو کې د صرافانو اتحادیو، صنعتکارانو او نورو سوداګرو هم د مرستو راټولولو کمپاینونه پیل کړي او ځینې کسان عملا په زلزله ځپلو سیمو کې د مرستو په وېش بوخت دي.
په ورته مهال د افغانستان د کرېکټ ملي لوبډلې لوبغاړو راشد خان او محمد نبي هم د مرستو راټولولو کمپاینونه پیل کړې دي.
له هېواده بهر هم په بېلابېلو هېوادونو کې افغان ټولنو د نغدي مرستو راټولولو هڅې پیل کړې دي، خو تر اوسه د یادو راټولو شویو مرستو کره شمېر نه دی په ډاګه شوی.
خو د طالبانو ریاست الوزار بیا د زلزلې د ټپیانو انتقال،خوراکي توکو، جامو او نورو بېړنیو اړتیاوو لپاره یوازې سل مېلیونه افغانۍ ځانګړې کړې دي.
امریکا چې په تېرو دوو لسیزو کې د افغانستان لپاره یو له لویو مرستنېدویانو و، د کونړ د وروستۍ زلزلې له قربانیانو سره یې د مرستې ژمنه کړې ده، خو لا هم دغه هېواد د خپلو مرستو څرنګتیا نه ده په ډاګه کړې.
د افغانستان په ختیځ کې، چې د یکشنبې په شپه یوې شدیدې زلزلې ولړزاوه، تردې مهاله ۲۲۰۵ تنه مړه شوي او ۳۶۴۰ نور ټپیان شوي دي.
د راپورونو له مخې، د زلزلې د قربانیانو په شمېر کې هره شېبه زیاتوالی راځي او ښايي د طالبانو له خوا له اعلان شویو شمېرو لوړ وي.
په ورته مهال مرستندویه ادارو له نړیوالې ټولنې غوښتنه کړې، چې د افغانستان لپاره بیړنۍ مرستې زیاتې کړي.