د کندهار عینو مېنې په جامع جومات کې د جمعې لمانځه پر مهال له کویټې څخه ورغلي ديني عالم مولوي «نورالدین اغا» ته د طالبانو لهخوا د وینا کولو اجازه نده ورکړل شوې. ویل کېږي، چې د هغه ګڼ شمېر مینوال د جمعه لمانځه ته ورغلي وو، ترڅو د هغه وینا واوري او په امامت کې یې لمونځ ادا کړي.
سرچینو د جمعه په ورځ (د وږي ۱۴مه) افغانستان انټرنشنل ـ پښتو ته وویل، چې د هغه د راتګ او وینا په اړه له یوې ورځې وړاندې خلکو ته خبر ورکړل شوی و او ګڼ شمېر مینوال یې د جمعه لمانځه ته ورغلي وو.
د سرچینو په خبره، د لمانځه پر مهال د امر بالمعروف مسوولینو نوموړي ته د وینا او امامت اجازه ورنه کړه.
مولوي نورالدین اغا د خپلو ټولنیزو او د خلکو د ستونزو اړوندو ویناوو له امله په افغانستان او په ځانګړي ډول په کندهار کې پراخ شهرت او محبوبیت لري.
د هغه د خبرو اورېدو لپاره ګڼ شمېر ځوانان او د ټولنې بېلابېل قشرونه راټولېږي.
د خلکو په وینا، د طالبانو دا پرېکړه د «مولوي نور الدین اغا» د زرګونو مینوالو د زړهخوږۍ لامل شوې او ګڼ شمېر کسانو د طالبانو دا کار غندلی دی.
هغوی وایي، د داسې دیني عالمانو ویناوې چې د ټولنې په اصلاح او د خلکو په راویښولو کې مهم رول لري، باید د هغوی پر وینا محدودیت ونه لګول شي.
تر دې دمه د طالبانو د اړوندو ادارو له خوا په دې اړه رسمي څرګندونې نه دي شوي.
