د طالبانو د اوبو او برېښنا وزارت سلاکار فاروق اعظم خپل زوی ته په لیک کې لیکلي، چې طالبانو د ښځو زده کړو، عصري زده کړو او د امر بالمعروف د کمزوریو د په ګوته کولو له امله زندان ته اچولی دی. فاروق اعظم ویلي، « دا هغه څه دي، چې زه تر دغه سخت چلند ته تیار یم».
هغه دغه راز په دغه لیک کې ویلي، چې ددین، وطن او «امارت» د استحکام لپاره متعهد دی.
نن د دوشنبې په ورځ د طالبانو د اوبو او برېښنا وزارت سرچینو افغانستان انټرنشنل ته وویل چې فاروق اعظم د طالبانو د مشر په امر نیول شوی دی.
فاروق اعظم د کونړ زلزلې پرمهال ویلي و، ښځینه روغتیاپالانې دې هغو طالبانو ته د درس کېدو په موخه کونړ ته لاړې شي چې د مېرمنو تعلیم ګټور نه بولي.
سرچینې وايي، د فاروق اعظم له نیول کېدو وروسته د هغه دوسیه د کابل نظامي محکمې ته لېږل شوې ده.
سرچینه وايي، « نوموړي په دې وروستیو کې لیکنې کولې او په شخصي مجلسونو کې یې د امارت د پالیسۍ خلاف څرګندونې کولې نو له همدې امله نیول شوی دی».
د طالبانو تر واک لاندې د افغاني سرې میاشتې ټولنه کې سرچینو نن دوشنبه د (وږي ۲۴مه) وویل، چې د سرې مياشتې رییس شهاب الدین دلاور ځېنې کارکوونکي د تنقيص په پلمه له دندو لرې کوي او پر ځای يې خپل کسان په دندو ګوماري.
د رارسېدلو سندونو له مخې، شهاب الدین دلاور په نږدې وختونو کې شاوخوا ۳۵ کسان یوازې له لوګر او میدان وردګ ولایتونو ګومارلي دي.
له وړاندې هم افغانستان انټرنشنل ـ پښتو ته رسېدلو سندونو کې ښودل شوې، چې د طالبانو د افغاني سرې میاشتې ټولنې مشر شهاب الدین دلاور خپل څو تنه نژدې کسان له کانونو وزارت نه بېولي او په دې ټولنه کې یې مقرر کړي.
تر طالبانو مخکې په جمهوریت هم نیوکې دا وې چې د وزیر په بدلېدو سره د اړوند وزارت مختلف چارواکي په تېره د وزیر له دفتر سره نږدې کسان بدلېږي او اړوند چارواکي خپل د راز او نیاز کسان ګوماري.
دغه چاره د اداري فساد د زیاتېدو یو مهم لامل هم بلل کېده.