طالبان وايي په هرات کې یې درې ماشومان له کورني بند او وهلو ډبولو وژغورل
طالبان وايي، په هرات کې ددې ډلې د امر بالمعروف محتسبانو درې یتیم ماشومان چې د خپلې میرې له خوا شکنجه او په کورني بند کې ساتل کېدل، ژغورلي دي.
طالبان وايي، په هرات کې ددې ډلې د امر بالمعروف محتسبانو درې یتیم ماشومان چې د خپلې میرې له خوا شکنجه او په کورني بند کې ساتل کېدل، ژغورلي دي.
په هرات کې د طالبانو امر بالمعروف رییس عزیزالرحمن المهاجر د دې ډلې تر واک لاندې باختر اژانس ته ویلي، چې درې یتیم ماشومان یې، چې د خپلې میرې له لوري شکنجه شوي او په کورني زندان کې ساتل کېدل، ژغورلي دي.
نوموړي ویلي چې د ماشومانو میره مور یې عدلي او قضايي ادارو ته ورپیژندلې ده.
طالبانو د یادو ماشومانو انځورونه هم خپاره کړې، چې پر بدن یې د وهلو ډبولو نښې هم ښکاريږي.
په هرات کې سیمه ییزو طالب چارواکو ویلي، چې د تېرو څلورو کلونو په اوږدو کې یې د ښځو او ماشومانو په ګډون لسګونه کسان له کورني زندان او شکنجو ژغورلي دي.
د افغانستان لپاره د امریکا پخواني استازي زلمي خلیلزاد په یوه اېکس پوسټ کې د حزب اسلامي مشر حکمتیار «د کابل قصاب» یاد کړی او وايي، نوموړی اوس هڅه کوي ځان د سیاسي او اخلاقي مرجع په توګه معرفي کړي. خلیلزاد دغه پوسټ د حزب اسلامي اړوندو اکاونټونو د یوې لیکنې په غبرګون کې کړی.
د افغانستان لپاره د امریکا پخواني استازي زلمي خلیلزاد د چهارشنبې په ورځ پر اېکس پاڼې په توندو الفاظو حکمتیار د کابل قصاب یاد کړی او لیکلي یې دي «هغه کس چې په کابل کې یې د نجونو پر مخونو تیزاب شیندل، په پېښور کې د نورو مقاومت ډلو د غړو د وژلو او تښتولو له امله بدنام و، هغه اوس هڅه کوي چې ځان د سیاسي او اخلاقي مرجع په توګه بیا معرفي کړي».
خلیلزاد دغه پوسټ د حزب اسلامي اړوندو اکاونټونو د یوې لیکنې په غبرګون کې کړی، چې نوموړی یې د افغانستان نا علان شوی ولسمشر بللی و، خو دغه لیکنه وروسته حذف شوې ده.
خلیلزاد د چارشنبې په ورځ پر اېکس لیکلي چې د شوروي ځواکونو له وتلو وروسته حکمتیار په خونړۍ کورنۍ جګړه کې ښکېل شو، پر خپل ښار یې بمونه واچول، جوړې کوڅې او سیمې یې ورانې کړې او سلګونه کسان یې ووژل.
خلیلزاد زیاته کړې چې خلک دا هر څه نه هېروي «زه خو یې هېڅکله نه هېروم.»
هغه دغه رز ویلي چې حکمتیار په مسکو کې له ملا برادر سره د لیدو لپاره ډېر ناکراره و او غوښتل یې چې له هغه سره یوې معاملې ته ورسېږي، خو خلیلزاد وایي، طالبانو رد کړ.
هغه زیاته کړې چې حکمتیار په تېرو وختونو کې د پاکستان د استخباراتي ادارې (ایایسای) او د ایران د قدس ځواک خدمت کړی دی.
حکمتیار تراوسه د خلیلزاد ځواب نه دی ویلی او نه یې هم پر اېکس د نوموړي په اړه څه ویلي دي.
د حزب اسلامي ځینې سرچینې شهادت ورځپاڼه او ځینې نور اکاونټونه د حکمتیار د رسمي نظر ښکارندوی
د افغانستان لپاره د روسیې ځانګړي استازي ضمیر کابلوف په مسکو کې د طالبانو سفیر ته ژمنه ور کړې، چې د شانګهای راتلونکې غونډې ته به طالبان وبلل شي. کابلوف ویلي، د شانګهای همکارۍ سازمان په وروستۍ غونډه کې افغانستان ته د ناظر غړیتوب ورکولو په تړاو اکثریت رایې ورکړل شوې دي.
په مسکو کې د طالبانو سفارت د چار شنبې په ورځ وویل، چې په ورسیه کې د دې ډلې سفیر مولوي ګل حسن حسن د افغانستان لپاره د روسیې له ځانګړي استازي ضمیر کابلوف سره کتلي دي.
په مسکو کې د طالبانو سفارت د کابلوف له قوله لیکلي، چې د شانګهای همکارۍ سازمان په وروستۍ غونډه کې افغانستان ته د ناظر غړیتوب د ورکولو لپاره اکثریت رایې کارول شوې او افغانستان به د شانګهای همکارۍ سازمان په راتلونکو غونډو کې رسمي ګډون وکړای شي.
پر همدغه مهال په مسکو کې د طالبانو سفیر د شانګهای همکارۍ سازمان په غونډو کې ګډون اړین بللی دی.
د شانګهای همکارۍ سازمان دوه ورځنۍ غونډه د وږي میاشت په ۱۱ نېټه د چین په تیانجین ښار کې ترسره شوه چې د نړۍ له ۲۰ څخه د زیاتو هېوادونو مشرانو پکې ګډون کړی و، خو طالبانو ته بلنه نه وه ورکړل شوې.
پاکستان په اسلام اباد کې د طالبانو سفیر احضار کړی او ترې غوښتي یې دي، چې له تحریک طالبان پاکستان (ټيټيپي) سره دې خپلې اړیکې پرې کړي او د دې ډلې د لهمنځه وړو په برخه کې دې خپلې ژمنې عملي کړي. پاکستان خبرداری ورکړی چې که افغان طالبان دا کار ونه کړي، نو دا به «دښمني» وګڼل شي.
اسلام اباد خپله دا غوښتنه په یاد هېواد کې د طالبانو سفیر احمد شکیب ته ویلې چې طالبانو ته یې ورسوي. د پاکستان د بهرنیو چارو وزارت تېره ورځ طالب سفیر احمد شکیب احضار کړی و. نوموړي ته په ښکاره وویل شول چې چې افغان طالبان باید ډاډ ورکړي چې افغان خاوره د ترهګریزو فعالیتونو لپاره نه کارول کیږي.
تر دې مخکې هم د پاکستان لومړي وزیر شهباز شریف له طالبانو غوښتي و چې «زموږ او ټيټيپي ترمنځ باید یو وټاکی.» د شهباز شریف دغو څرګندونو څخه څو ورځې تېریږي خو طالبانو یې ځواب نه دی ورکړی.
پاکستاني رسنۍ جیونیوز راپور ورکړی چې د طالبانو سفیر د دې لپاره احضار شوی و چې په دې وروستیو کې "فتنه الخوارج" ترهګرو فعالیتونو کچه لوړه شوې ده، د دوی په وینا دغې ډلې افغانستان کې پنا اخیستي چې د هند د استخباراتي ادارې له خوا تمویلیږي او ملاتړ یې کیږي.
تمه کېږي چې د افغانستان لپاره د پاکستان ځانګړی استازی محمد صادق خان به د دې اوونۍ په پای کې د لوړپوړو چارواکو له یوه پلاوي سره کابل ته سفر وکړي او هلته به له طالبانو سره د وروستیو پرمختګونو او دوه اړخیزو مسایلو په اړه خبرې وکړي.
صادق خان به د پاکستان د مشرتابه له لوري یو جدي پیغام د افغانستان پلازمېنې چارواکو ته ورسوي. نوموړی به د طالبانو د بهرنیو چارو وزیر ملا امیرخان متقي سره هم وګوري.
د تېر جمهوري نظام پر مهال د ولسمشر لومړي مرستیال امرالله صالح ویلي، د طالبانو په تړاو د ملګرو ملتونو د سرمنشي څرګندونې په تاریخ کې بې سارې دي او دا ډول سپکاوی یوازې د طالبانو ډلې پورې اړوند دی. هغه وايي، باید مبارزه وکړو، چې «طالبستان» بېرته په افغانستان واړول شي.
امرالله صالح په خپل تازه ایکس پوسټ کې لیکلي، د ملګرو ملتونو سرمنشي ډېر محتاط سړی دی او خبرې په دقت کوي، خو کله چې هغه د طالبانو کړنې «احمقانه» وبللې، دا ښکاره کوي چې «هر څوک چې احمقانه کارونه کوي، خپله احمق وي.»
هغه ټینګار کړی: «په تاریخ کې لومړی ځل دی چې د یوې ډلې لپاره، چې پر یو هېواد واک لري، د ملګرو ملتونو له لوري ورته دا ډول اصطلاح کارول کېږي، له دې لوی سپکاوی او توهین نور نشته.»
صالح زیاته کړې چې په دوحه کې د اسلامي هېوادونو په وروستۍ فوقالعاده غونډه کې، چې د اسراییل د بریدونو له امله رابلل شوې وه، طالبانو ته بلنه نه وه ورکړل شوې.
د نوموړي په وینا، «طالبان نه په اسلامي نړۍ کې عزت او اعتبار لري او نه په نړیوالو سازمانونو کې، دا ډول انزوا او تجرید بېساری دی.»
صالح یو ځل بیا یادونه کړې: «ټول توهینونه او تحقیرونه د طالبانو په ډلې پورې اړه لري، نه په افغانستان پورې، موږ باید تل د طالبانو او افغانستان ترمنځ فرق باندې قایل شو.»
هغه له نړیوالو سره په ګډ غږ کې ویلي: «رېښتیا مو ویلي ښاغلی ګوترېش، خو لږ ناوخته، ستاسې شجاعت او درک د ستاینې وړ دی.»
یاده دې وي چې د ملګرو ملتونو سرمنشي د طالبانو پر پالیسیو توند غبرګون ښودلی او ویلي یې دي، چې په افغانستان کې روان وضعیت بوږنووونکی او احمقانه دی.
نوموړي ټینګار کړی نړیواله ټولنه باید طالبان وهڅوي چې دغه محدودیتونه پای ته ورسوي.
سرچینو افغانستان انټرنشنل ته وویل، چې د نوري فایبراو انټرنېټ د قطع کولو په تړاو د طالبانو د مشر تصمیم نهايي دی او له کابل نه د ورغلي پلاوي خبرې بې نتیجې پای ته رسېدلې. د طالبانو مشر ویلي، چې دولتي ادارو او ډیپلوماتیکو استازځایونو ته د انټرنیټ ورکولو لپاره دې نوې کمپنۍ ایجاد شي.
په کندهار کې سرچینو د چارشنبې په ورځ افغانستان انټرنشنل ته وویل، چې د نوري فایبر او انټرنیټ د قطع کولو په تړاو د طالبانو د مشر مولوي هبت الله اخوندزاده تصمیم نهايي دی.
د انټرنیټي خدماتو د یوې کمپنۍ مسوول افغانستان انټرنشنل ته وویل، چې د طالبانو د مشر د پرېکړې له مخې به یوازې محدود واټساپ شمېرو ته ، چې ددې ډلې په جواز به وېشل کیږي او تر څار لاندې به وي، انټرنیټي خدمات ورکول کیږي. دغه واټساپ شمېرې به سوداګرو او ځانګړو کسانو ته ور کول کیږي.
سرچینه وايي، له اترا ادارې، په کابل کې د طالبانو له چارواکو او په کندهار کې د طالبانو له مشرانو سره د مخابراتي شبکو د مسوولانو او له کابل نه د تللیو طالب چارواکو لیدنې کتنې تراوسه بې نتیجې دي. ملا هبت الله تر اوسه په دې اړه خبرو اترو ته نه دی چمتو شوی.
سرچینې وايي، چې سلام مخابراتي شبکې ته ښايي د محدود انټرنیټ د توزیع اجازه ورکړل شي.
سرچینې وايي، ملا هبت الله ویلي، یوه نوې مخابراتي کمپنۍ رامنځته شي، چې یوازې ځینو دولتي ادارو، بانکونو او ډیپلوماتیکو استازځایونو ته د انټرنیټ خدمات ور کړي.
سرچینې وايي، چې له کابل نه د طالبانو د وزیرانو او نورو چارواکو د تللي پلاوي خبرې اترې بې پایلې پای ته رسېدلې دي.
کندهار ته د طالبانو یو شمېر وزیران او چارواکي تللي، چې د دې ډلې د کانونو او پټرولیم وزیر ملا هدایت الله بدري، د مالیې او اقتصاد وزیران، د کورنیو چارو وزارت لوی مرستیال ابراهیم صدر او افغانستان بانک رییس پکې شامل دي.
تېره ورځ سرچینو افغانستان انټرنشنل ته وویل، چې د دغه پلاوي د سفر هدف د نوري فایبر او انټرنیټ خدماتو د قطع کولو په تړاو له مولوي هبت الله سره خبرې اترې دي.
طالبانو د خپل مشر په لارښوونه په کندهار، نیمروز، هلمند، کندز، مزار شریف او یو شمېر نورو ولایتونو کې د نوري فایبر خدمات قطع کړي دي او په ځینو ولایتونو کې د مخابراتي شبکو خدمات هم کله وصل او کله قطع کیږي.
سرچینې وايي، د طالبانو مشر غواړي په تدریج سره د انټرنیټ خدمات قطع کړي.
په مزار شریف کې طالب سرچینو وویل، چې ددغه اقدام هدف د « منکراتو» مخنیوی دی.
