وسلهوالو کسانو د هرات ولایت د پولیسو پر پخواني افسر داسې مهال ډزې وکړې، چې له خپل کور څخه د وتلو په حال کې و. ځايي سرچینې وایي، چې هغه په دغه برید کې وژل شوی دی. د پولیسو دغه افسر پخوا د طالبانو پر ضد جګړه کې ټپي شوی و او په یوه سترګه ړوند شوی هم و.
دغه پېښه پرون سهار (د وږي ۳۰مه) د هرات ښار د «فرقهسابق» نواباد په سیمه کې وشوه، چې له امله یې د هرات د امنیې قوماندانۍ پخوانی افسر ګل اقا جلالي ووژل شو.
د هرات دوو پخوانیو پولیسو له افغانستان انټرنشنل سره په خبرو کې د دغه پېښې پخلی کړی دی. دوی ویلي، چې نوموړی افسر پخوا د هرات د امنیې قوماندانۍ په عملیاتي قطعه کې د ساتنمن په توګه دنده لرله. د دغه قطعې دنده د ښار په شاوخوا سیمو کې عملیات کول او د وسلهوالو مخالفینو د بریدونو مخنیوی و.
د دغه پخوانیو پولیسو په وینا؛ ګل اقا تر دې وړاندې د وظیفې پر مهال ټپي شوی و او یوه سترګه یې هم ړنده شوې وه.
په وروستیو وختونو کې په هرات ولایت کې څو خونړۍ پېښې شوې او خلک یې اندېښمن کړي دي. طالبانو تر اوسه د دغه وژنو په تړاو د چا د نیولو یادونه نه ده کړې.
ملګرو ملتونو او د بشري حقونو نړۍوالو بنسټونو تر دې وړاندې څو ځله د پخواني حکومت د امنیتي ځواکونو د وژنو په اړه اندېښنه ښودلې ده. د یوناما راپورونه ښیي، چې د طالبانو تر دویمې واکمنۍ وروسته د پخواني حکومت لسګونه افسران او سرتېري په نښه او وژل شوي دي.
د افغانستان په یو شمېر ولایتونو کې د طالبانو د مشر ملاهبت الله له لوري د نوري فایبر انټرنېټ له بندېدو سره هممهاله د دغې ډلې د ویاند ذبیح الله مجاهد هغه ویډیو په خواله رسنیو کې لاس په لاس کېږي، چې نوموړی په کې دوه کاله وړاندې د دغه کېبلي انټرنېټ په ستاینو بوخت دی.
ذبیحالله مجاهد دوه کاله وړاندې یوې غونډې ته د وینا پر مهال ویلي: «د سپوږمکۍ انټرنېټ بېخي قیمته دی، هر څه چې وکړو کلنی لګښت یې ډېر دی او نه یې شو کولای. د نوري فایبر یو مستقیم لېن باید افغانستان ته راوړو، چې دا هم ارزانه تمامېږي او تېز هم دی».
د ملاهبت الله دغه ویاند اوس د خپل مشر له انټرنېټي بندیز سره غلی دی او ښايي خپلې دغه پخوانۍ څرګندونې یې اوس ذهن کې ور ګرځي. مجاهد که یو مهال د نوري فایبر په ستاینو بوخت و؛ خو اوس په دې اړوند د خپل مشر د بندیزونو له امله چوپه خوله دی او لا تر اوسه یې په دې تړاو هېڅ ډول عامه نظر نه دی څرګند کړی.
د طالبانو د کابینې یو شمېر غړي هم د نوري فایبر شبکې پرې کېدو په غبرګون کې تېره اونۍ کندهار ته تللي وو، ترڅو ملا هبت الله قانع کړي چې دغه بندیز یې ناوړه پایلې لري؛ خو بېرته نهیلې او تش لاس کابل ته ګرځېدلي دي. خپل مشر ورته په ښکاره ټکو ویلي، چې دی د انټرنېټ د «بندیز په تړاو هېڅ ډول دلیل نه مني» او باید دغه حکم یې په جدي توګه ژر تر ژره عملي شي.
په افغانستان کې یو شمېر سوداګرو او کاروباریانو نیوکې کړې دي، چې د هبتالله دغه بندیز یې روزګارونه سخت خراب کړي دي او که دوام وکړي؛ نو مجبوره دي چې هېواد پرېږدي. د معلوماتي ټکنالوژۍ د کارپوهانو نیوکې دا دي، چې په ۲۱مه پېړۍ کې د ملاهبت الله دغه بندیز سره له دې چې خندوونکی دی؛ بلکې ځورونکی هم دی.
د معلوماتي ټکنالوژۍ د کارپوهانو په وینا؛ اوسني عصر کې له انټرنېټ پرته له نړۍ سره وصل کېدنه، حکومتولي، روزګارونه مخته وړل او ان زدهکړې کول هم ناشوني دي. د افغانستان په اکثریت ولایتونو کې د نوري فایبر انټرنېټ بند شوی او تېره ورځ افغانستان انټرنشنل ته یو شمېر ښاریانو پېغامونه راستولي وو، چې د انټرنېټ سرعت بېخي کم شوی دی.
باورونه دا دي، چې د طالبانو مشر په دغه بندیز سره غواړي د ده حکومت اسنادونه، د چارواکو ناوړه حرکتونه او ورځني تاوده مسایل د رسنیو او یا هم د خواله رسنیو تر کاروونکو ونه رسېږي. هغه وېره لري، چې د بیان ازادي، رسنۍ او خواله رسنۍ کولای شي چې د طالبانو پر وړاندې د خلکو ذهنونه لا ډېر راوپاروي.
د افغانستان له رسنیو د ملاتړ سازمان د یوې نوې نظر پوښتنې د پایلو په خپرولو سره ویلي، چې افغان خبریالانې د «حقیقت او بقا» لپاره مبارزه کوي او په وینا یې نړۍواله ټولنه باید د دوی تر څنګ ودرېږي.
دغه سازمان د روان کال په جولای او اګسټ میاشتو کې له ۱۰۱ ښځينه خبریالانو سره تر مرکو وروسته د خپلې سروې پایلې د یکشنبې په ورځ (د وږي ۳۰مه) خپرې کړې او له مخې یې، ډېری ښځینه خبریالانې له شلو تر ۳۵ کلونو عمرونه لري، له دوو تر لسو کلونو کاري تجربې لري او ډېری یې په کابل کې مېشتې دي، خو له سختو محدودیتونو لکه سانسور او جنسیتي تبعیض سره مخ دي او دمګړی یوازې ۶ اعشاریه ۹ سلنه یې کولی شي په ښکاره او رسمي ډول کار وکړي او پاتې نور یې تر محدودیتونو لاندې یا په پټه کار کوي او یا هم د رسنیزو کارونو پرېښودو ته اړې شوې دي.
د دغه راپور د موندنو له مخې، نږدې نیمايي ځواب ورکوونکو ویلي، چې تر راتلونکو ۱۲ میاشتو د کار دوام ته هیله مندې نه دي.
د طالبانو په بیا واکمنېدو سره له دولتي رسنیو ټولې ښځینه کارکوونکې په خپلو کورونو کېنول شوې، ځينې افغان ښځينه خبریالانې له هېواده ووتلې، ځينې یې لا هم تر سختو شرایطو لاندې په هېواد کې خپلو فعالیتونو ته دوام ورکوي او یو زیات شمېر ښځينه خبریالانو بیا دغه مسلک ته شا کړه.
د یادونې وړ ده، چې افغانستان تر ۲۰۲۱ کاله د بیان ازدۍ په نړۍوال شاخص کې ۱۲۲ ځای درلود، خو اوس د نوملړ ۱۷۸ ځای ته رالوېدلی دی.
دا په داسې حال کې ده، چې اوسمهال د افغانستان رسنۍ د طالبانو تر سخت څار لاندې فعالیت کوي او له ګڼو محدودیتونو سره مخ دي.
د افغان خبریالانو او رسنیو ملاتړ سازمانونه وایي، چې باید د نړۍوالې همکارۍ له لارې د افغان ژورنالیستانو د خوندیتوب او د رسنیو د پیاوړتیا زمینه برابره شي.
په افغانستان کې د اروپایي اتحادیې پخواني مرستیال مایکل سمپل له افغانستان انټرنشنل سره په مرکه کې ویلي، چې ټرمپ په جدي ډول د بګرام اډې د بېرته ترلاسه کولو په خبره ولاړ دی. نوموړي ویلي: «څوک چې د بګرام اډې په برخه کې مشکل جوړوي باید د ټرمپ له غوسې ووېرېږي.»
سمپل د یکشنبې په ورځ (د وږي ۳۰مه) له افغانستان انټرنشنل سره په مرکه کې د بګرام اډې ته د امریکا د بېرته تګ اړوند څرګندونې کړي. هغه ویلي، چې بګرام په سیاسي او نظامي برخو کې د امریکا لپاره مهمه ده او اوسمهال دې سیمې ته د امریکا تګ د ټرمپ له لومړیتوبونو څخه ګڼل کېږي.
د هغه په خبره، ټرمپ دې اډې ته د بېرته ګرځېدو اړوند په واضیح توګه څه نه دي ویلي، چې د کومو موخو لپاره ځي.
سمپل زیاتوي، چې امریکا په بګرام اډه کې پانګونه کړې ده: «په بګرام کې، د هغو تاسیساتو ترڅنګ چې پخوا روسیې جوړ کړي وو، په وروستیو کې امریکا هم پانګونه کړې او اوس ټرمپ د هغې د مالکیت احساس کوي.»
مایکل سمپل دا هم ویلي، چې افغانستان ته د امریکا بیا تګ به د سیمې هېوادونو لپاره یوه جنجالي موضوع وګرځي.
هغه زیاته کړې: «د افغانستان ګاونډيان د امریکا شتون په ګټه نه یادوي، پاکستان چې په سیمه کې ځان د امریکا استازی ګڼي د امریکا په شتون کې به یې رول صفر وي، ایران هم دا یو تهدید ګڼي، چین او روسیه هم ورته اندېښنې لري.»
د سمپل په خبره، په یاده موضوع کې ټرمپ د خپلو متحدینو ملاتړ ته هم اړتیا نه لري: «د ټرمپ ټول متحدین د هغه له غوسې وېرېږي او فکر نه کوم چې څوک دې د هغه مخالفت وکړي.»
مایکل سمپل زياتوي، چې طالبان یوه نړۍوال ملاتړ ته اړتیا لري او د خپل حکومت د دوام لپاره مجبور دي چې د امریکا سره اړیکې جوړې کړي.
نوموړي د طالبانو د مشر سخت دریځۍ او توندو خبرو ته په اشارې ویلي: «د هبتالله توندلاري دریځ، د جهاد او شهیدانو اړوند خبرې او له امریکا سره د اړیکو جوړول ښايي د هغه د ملګرو په ذهن کې دا پوښتنه راپورته کړي، چې دومره جهاد او قربانۍ د څه لپاره وې؟ او که اړیکې جوړې نه کړي، نو طالبانو ته به بیا سرخوږی جوړ شي.»
ډېری سیاسي شنونکي باور لري، چې طالبان اوسمهال د پاڼ او پړانګ تر منځ حیران پاتې دي.
دا په داسې حال کې ده، چې د امریکا ولسمشر ډونالډ ټرمپ له طالبانو وغوښتل، چې د بګرام هوايي اډه امریکا ته وسپاري. ټرمپ خبرداری ورکړ: «که افغانستان د بګرام هوايي اډه هغو کسانو ته چې دا اډه یې جوړه کړې، یعنې د امریکا متحده ایالاتو ته بېرته ورنکړي، نو بدې پېښې به رامنځته شي.»
د امریکا ولسمشر ډونالډ ټرمپ دغه څرګندونې په ټروټ سوشل کې د شنبې په ورځ (د وږي ۲۹مه وکړې او یو ځل بیا یې خبرداری ورکړ، چې که یاده اډه دوی ته و نه سپارل شي نو بده پېښه به رامنځته شي.
د امریکا ولسمشر په خپل دغه لنډ متن کې د هغه څه په اړه چې «بدې پېښې» یې بللي، نور جزیات نه دي ورکړي.
د طالبانو د لوړو زده کړو وزیر ندا محمد ندیم وايي، په تېر نظام کې په پوهنتونونو کې د «ډاروین» نظریې تدریس کېده او همداراز اخلاقي فساد ته لمن وهل کېده، خو زده کړیالان بیا په درسي ماحول کې د ډاروین نظریات یوه تیوري ګڼي او د اخلاقي فساد په تړاو د ندیم خبرې په کلکه ردوي.
د طالبانو د لوړو زده کړو وزارت سرپرست ندا محمد ندیم چې دغه وزارت ته له رسېدو سره سم یې په پوهنتونونو کې د نجونو د زده کړو پر دوام «تر امر ثاني» بندیز ولګاوه، د یکشنبې په ورځ یې د یوه خصوصي پوهنتون له لوري «په لوړو زده کړو کې د کیفیت تضمین د نظام ارزونې او پیاوړتیا نړۍوال دوه ورځني کنفرانس» کې وویل، د لوړو زده کړو په نظام او په ځانګړي ډول نصاب کې ډېرې ستونزې وې: «د بېلګې په ډول د ډاروین عقیدې تدریسېدل، اخلاقي فساد ته لمن وهل او نور د اسلام مقدس دین د عقیدې او ارزښتونو خلاف محتوا تدریسېده، چې د له منځه تلو په حال کې ده.»
چارلز ډاروین (۱۸۰۹ – ۱۸۸۲) یو برېتانوی طبیعت پوه، جیولوجېست او بیولوژېست و. هغه د نړۍ د ساینس په تاریخ کې ډېر مهم شخصیت ګڼل کېږي. هغه د ارتقا د تیورۍ له امله ډېر مشهوره دی او په همدې اړه یې ویلي، ټول ژوندي موجودات (بوټي، حیوانات، انسانان) د زرګونو، میلیونو کلونو په اوږدو کې ورو ـ ورو بدل شوي دي.
په تېر نظام کې د هېواد د پوهنتونونو یو شمېر زده کړیالان په پوهنتونونو کې د اخلاقي فساد په تړاو د ندیم ادعاوې ردوي او وايي، پوهنتون د لوړو زده کړو ځای و او پکې ټولو بالغو کسانو خپل درسي چارې پر مخ وړلې.
دغه زده کړیالان د ندا محمد ندیم هغه څرګندونې چې په پوهنتونونو کې د اسلام سپېڅلي دین د ارزښتونو خلاف محتواوې تدریسېدې ردوي او وايي، د هېواد په پوهنتونونو کې د ثقافت په نوم ځانګړی پوهنځی او په نورو پوهنځيو کې ثقافت د یوه مضمون په توګه د دوکتورا لرونکو استادانو له لوري تدریسېده.
ندیم د طالبانو له بیا واکمنېدو سره سم د کابل والي شو او بیا د لوړو زده کړو وزارت د سرپرست په توګه وټاکل شو، خو وزارت ته په رسېدو سره یې د لسګونه زره نجونو د زده کړو له دوامه مخنیوی وکړ او د هغه دغې چارې ګڼ کورني او نړۍوال غبرګونونه راوپارول او لا هم افغان نجونې، نړۍوال او د بشري حقونو اړوند سازمانونه د نجونو د زده کړو د دوام غوښتونکي دي.
د بامیان ولایت لپاره د طالبانو والي عبدالله سرحدي په کابل کې د اندونیزیا سفارت له شارژدافیر نندا اېوالېست سره په کتنه کې له هغه وغوښتل، چې د دغه ولایت پر کانونو د پانګونو په برخه کې همکاري وکړي. یاد شارژدافیر هم د همکارۍ ډاډ ورکړی دی.
د بامیان والي عبدالله سرحدي د یکشنبې په ورځ (د وږي ۳۰مه) د دغه ولایت په دفتر کې په کابل کې د اندونیزیا له سفیر نندا اېوالېست سره په کتنه کې د یاد ولایت د اوسېدونکو اړتیاوو ته په اشارې سره له هغه وغوښتل: «د دغه ولایت پر کانونو او بنسټيزو پروژو د پانګونو په ګډون په بېلابېلو اقتصادي برخو کې د همکاریو زمینه برابره کړي.»
د دغه ولایت د خبرپاڼې له مخې، په دې کتنه کې په کابل کې د اندونیزیا سفارت شارژدافیر ډاډ ورکړی، چې په بامیان کې به د پانګونو د فرصتونو په تړاو له اندونیزیايي ملي پانګوالو سره خبرې وکړي.
هغه زیاته کړه: «زه به په بامیان کې د پانګونو د فرصتونو په تړاو د اندونیزیا له ملي پانګوالو سره خبرې وکړم او په خپله هم هڅې کوم چې په اقتصادي برخو او په ځانګړې توګه د کانونو د را اېستنې لپاره د همکاریو زمینه برابره کړم.»
د خبرپاڼې له مخې، عبدالله سرحدي د دغې کتنې په پای کې نندا اېوالېست ته بلنه ورکړه چې د دغه ولایت له لرغونو او تاریخي ځایونو له هغې ډلې د غلغلې او ضحاک، شش پل، بندیر امیر او له نورو طبیعي جاذبو لیدنه وکړي، خو په خبرپاڼه کې په دې اړه چې ایا د طالبانو له لوري د لومړي حاکمیت پر مهال د بودا د ویجاړو کړو پاتې شونې هم ورښودلي او که نه، څه نه دي ویل شوي.
د یادونې وړ ده، چې طالبانو نږدې ۲۵ کاله مخکې په خپل لومړي دور حاکمیت کې د ۱۳۷۹ کال د کب پر ۲۱مه د ملا محمد عمر په فرمان سره په بامیان کې د بودا دوه مسجمې (صلصال او شهمامه) به بمونو سره والوزول.