د افغانستان لپاره د برېتانیا ځانګړي استازي ریچارډ لینډسي د افغانستان په کچه د انټرنېټ د بندېدو او د نړۍوالو الوتنو د ځنډېدو په اړه اندېښنه څرګنده کړې او زیاته کړې یې ده، چې دا اقدام کولای شي د افغانانو لپاره «ناوړه او زیانمنې پایلې» ولري.
هغه په اېکس خواله رسنۍ لیکلي، چې د طالبانو دا اقدام کولای شي د افغانانو لپاره «ناوړه او زیانمنې پایلې» ولري.
نوموړي له طالبانو غوښتي، چې په ټول هېواد کې د انټرنېټ خدمتونو او د اړیکو بېرته ټینګښت ته اجازه ورکړي.
ریچارډ لینډسي هغه لومړنی لوړپوړی لوېدیځوال چارواکی بلل کېږي، چې د طالبانو د انټرنېټي بندیز په اړه یې غبرګون ښودلی دی.
نوموړي ټینګار کړی، چې د اړیکو پرېکون نه یوازې د خلکو ورځني ژوند ګډوډوي، بلکې د بشري او اقتصادي ستونزو د لا پسې زیاتېدو لامل ګرځي.
