د حماس یوه چارواکي العربیه شبکې ته ویلي، چې دې ډلې د قطر له لارې د اسراییل د دایمي شاتګ لپاره د امریکا تضمینونه ترلاسه کړي دي. هغه ټينګار وکړ: «امريکا تضمين ورکړی، چې زموږ مشران به زیان ونه ويني.»
د حماس چارواکي ویلي: «موږ د اسراییلیانو د جسدونو د راټولولو پروسه پیل کړې او موږ یې د بشپړولو لپاره د بمبارۍ د بندولو غوښتنه کړې ده.»
هغه زياته کړه، چې د یرغمل شويو کسانو سپارل به په یوه پړاو کې وشي، خو د جسدونو سپارل به لږ وخت ونيسي.
د هغه په وینا، دغه ډلې هوکړه کړې چې د نړۍوالې څارنې لاندې د فلسطین-مصر پلاوي ته وسلې وسپاري او امریکا ته یې د وسلو د سپارلو د هوکړې خبر ورکړی دی.
د حماس دغه چارواکي ويلي، چې اسرایيل د بمبارۍ او تباهۍ د دوام په وسیله د ټرمپ د طرحې د پلي کېدو بهیر ګډوډوي.
هغه ټينګار وکړ: «اسرایيل په دقیق ډول پوهېږي چې موږ څو تنه یرغمل او څو جسدونه لرو.»
