د طالبانو د عامې روغتیا وزارت د خوړو او درملو معینیت ویلي، چې په ۲۰۲۴ کال کې په افغانستان کې د بېکیفیته خوړو له کبله ۴۹۳ زره او ۹۶۸ کسان له عامې روغتیا وزارت سره ثبت شوي، چې له دې ډلې ۹۷ زره او ۲۴ کسان د بېکیفیته خوړو د بېلابېلو اغیزو له امله مړه شوي دي.
د طالبانو د عامې روغتیا وزارت نن سې شنبه، د تلې ۲۹مه، ویلي، چې د عامې روغتیا وزارت د خوړو او درملو معینیت د خوړو خوندیتوب عمومي ریاست په خوراکي محصولاتو کې د تحلیلشویو خطرونو په موخه د عامه پوهاوي غونډه کړې ده.
په کابل کې د طالبانو تر حاکمیت لاندې امید راډیو له یادې غونډې راپور ورکړی، چې په یاد کنفرانس کې د روغتیا نړیوال سازمان په حواله ویل شوي چې هر کال په نړۍ کې شاوخوا ۶۰۰ میلیونه کسان د ککړو خوړو له امله په بېلابېلو ناروغیو اخته کېږي چې دا ناروغۍ نه یوازې د انسانانو ژوند ګواښي، بلکې د هېوادونو اقتصاد ته ميلیاردونه ډالر زیان هم اړوي.
د طالبانو تر واک لاندې د خوړو او درملو معینیت اړوند د خوړو خوندیتوب عمومي ریاست مسوولینو افغانستان د خوراکي توکو په برخه کې وارداتي هېواد بللی، خو په وینا یې د طالبانو په راتګ سره اوس یو شمېر کارخونې دغه توکي په کور د ننه تولیدوي.
