په ملګرو ملتونو کې د افغانستان د استازولۍ سرپرست نصیر احمد فایق په سمنګان، بلخ او بغلان ولایتونو کې د تېرې شپې له زلزلهځپلو سره د مرستو غوښتنه وکړه. هغه همداراز له زلزلهځپلو کورنیو سره غمشریکي هم کړې ده.
نصیر احمد فایق د دوشنبې په ورځ (د لړم ۱۲مه) په خپله اېکس پاڼه زلزلهځپلو ته له تسلیت ویلو سربېره له ملګرو ملتونو او نورو مرستندویانو غوښتي، چې په دې سختو شرایطو کې د زلزلهځپلو لاسنیوی وکړي.
نوموړي زیاته کړې: «له ملګرو ملتونو او اړوندو بنسټونو یې، له دوست او ګاونډیو هېوادونو او نورو بشرپاله بنسټونو غواړو چې په بېړه د زلزلهځپلو لاسنیوی وکړي.»
