چین د افغانستان له زلزلهځپلو سره اړتیا وړ مرستو ته تیاری وښود
د چین حکومت اعلان کړی چې د افغانستان د اړتیاوو پر بنسټ، چمتو دی له زلزلهځپلو افغانانو سره د بشري او بیړنیو مرستو له لارې د دوی لاسنیوی وکړي.
د چین حکومت اعلان کړی چې د افغانستان د اړتیاوو پر بنسټ، چمتو دی له زلزلهځپلو افغانانو سره د بشري او بیړنیو مرستو له لارې د دوی لاسنیوی وکړي.
د چین د بهرنیو چارو وزارت ویاندې ماو نینګ، نن سې شنبه په یوه خبري غونډه کې وویل: « چین د افغانستان په شمال کې په زلزله کې د رامنځته شوې مرګ ژوبلې له امله خواشیني دی. موږ د قربانیانو کورنیو ته تسلیت وایو او د ټپیانو د ژر رغېدو هیله لرو.»
د هغې په وینا، بیجینګ د افغانستان له اړوندو بنسټونو سره د همغږۍ له لارې، د اړتیا پر اساس مرستې او ملاتړ چمتو کوي.
نوموړې زیاته کړه،چې چین باور لري د افغانستان خلک به وکولای شي له دې فاجعې سره مبارزه وکړي او خپلې کورنۍ او ټولنې بیاورغوي.
د یادولو وړ ده، چې د وړمې شپې په زلزله کې چې د افغانستان شمالي ولایتونه یې ولړزول، د بلخ او سمنګان په ګډون ګڼې سیمې زیانمنې شوې دي.
د لومړنیو راپورونو له مخې په دې زلزله کې چې د ریښتر په کچه ۶،۳ درجې ثبت شوې، ۲۸ تنه مړه او ۹۴۵نور ټپیان شوي دي.
د ملګرو ملتونو د بشري مرستو د همغږۍ دفتر(اوچا) ویلي، چې د زلزلې له امله په سمنګان او بلخ ولایتونو کې له ۹۰ ډیر کورونه ویجاړ شوي دي.
